„ქართული ოცნება“ არის ის ხელისუფლება, რომელმაც ყველაფერი გააკეთა, რომ საქართველოს მოქალაქეებს შესაძლებლობა მისცემოდათ, ვიზის გარეშე ემოგზაურათ ევროკავშირის ქვეყნებში. მე თავად ვიყავი ამ პროცესის მონაწილე, შეიძლება ითქვას, პირველივე დღიდან, როდესაც სავიზო დიალოგი დაიწყო ევროკავშირთან, ყველა ეტაპი, ფაქტობრივად, ჩემ თვალწინ გავიარეთ, – ამის შესახებ საქართველოს საგარეო საქმეთა მინისტრმა, მაკა ბოჭორიშვილმა ერთ-ერთი მედიის ეთერში განაცხადა.
მაკა ბოჭორიშვილი გამოეხმაურა ოპოზიციაში გაკეთებულ განცხადებებს, რომ ვიზალიბერალიზაციის შეჩერება „ქართული ოცნების“ ინტერესებში შედის, რათა საქართველო ევროკავშირს დაშორდეს.
როგორც ბოჭორიშვილმა აღნიშნა, კანდიდატის სტატუსსაც ხშირად იყენებდნენ შანტაჟის მექანიზმად, მაგრამ ამ მექანიზმმა არ იმუშავა.
„ძალიან კარგად მახსოვს, როგორი ერთსულოვნებით ტარდებოდა პოლიტიკურად ხელისუფლებისთვის საკმაოდ მძიმე რეფორმები და როგორ ხდებოდა პოლიტიკური გადაწყვეტილებების მიღება. ეს არ გაუკეთებია ბიუროკრატიას, ეს გააკეთა პოლიტიკურმა ხელისუფლებამ, რადგან ამის უკან იყო ძალიან სერიოზული პოლიტიკური ნება. ჩვენ ეს ყველაფერი უნდა გაგვეკეთებინა, რათა შედეგად მიგვეღო ჩვენი მოქალაქეების უვიზო მიმოსვლა. ძალიან კარგად მახსოვს, როდესაც 2013 წლის თებერვალში ჩამოვიდა ევროკომისარი და ჩამოიტანა სამოქმედო გეგმა, რომელი სამოქმედო გეგმითაც რამდენიმე წელი იმუშავა საქართველოს ხელისუფლებამ, რათა უვიზო რეჟიმი ამოქმედებულიყო, – განაცხადა მაკა ბოჭორიშვილმა.
ამასთან, როგორც მაკა ბოჭორიშვილმა აღნიშნა, ბრიუსელის ბიუროკრატია ხშირად ცდება თავისი ინიციატივების ეფექტიანობაში.
„ჩვენ ვნახეთ, რომ ბრიუსელის ბიუროკრატიას ბევრი რამ ეგონა ეფექტიანი საქართველოში ხელისუფლების შესაცვლელად. სინამდვილეში, მოხდა პირიქით – მოხდა ქართველი ხალხის მობილიზაცია სწორედ სუვერენიტეტისა და სახელმწიფო ინტერესების დასაცავად, როდესაც სასწორზე დაიდო ჩვენი ქვეყნის ინტერესები და უცხო ქვეყნის ინტერესები “, – განაცხადა მაკა ბოჭორიშვილმა.