ფოტოგრაფმა გიორგი აბდალაძემ გადაცემაში „იმედი LIVE“ „ნაციონალური მოძრაობის“ ხელისუფლების დროს „ფოტოგრაფების საქმეზე“ პატიმრობის დროს მასზე ზეწოლის ფაქტები გაიხსენა. მან აღნიშნა, რომ შიმშილობა მუქარით შეაწყვეტინეს.
„საპატიმროში 15 დღე მოგვიწია ყოფნა, 5 დღე იყო შიმშილობა. შიმშილობა შემაწყვეტინეს მუქარით – პატიმრები, მათ შორის, ისინიც, ვინც ჩემთან იჯდა, გამოიყვანეს საკნიდან და ჩემს თვალწინ უნდა ეწამებინათ. მეუბნებოდნენ, მერე ჩაგსვამთ მაგათთან და ნახეთ, რას გიზამენ. განცხადება დავწერე და მივიღე შიმშილობის შეწყვეტის გადაწყვეტილება. როგორი საყურებელია, რომ ადამიანი შენს გამო აწამონ. ამას ისეც ვუყურებდით, იყო სიტუაცია, როცა ჩვენს თვალწინ პატიმარი სცემეს. სცემეს უმძიმესი ავადმყოფი პატიმარი. საკანში რომ დავბრუნდი, პატიმარს გაუკვირდა, შიმშილობა რატომ შეწყვიტეო. ვუთხარი, თქვენს წამებაზე იყო საუბარი მეთქი. ისედაც მაგ მდგომარეობაში ვართ ყოველდღეო. შეუძლებელი იყო, მეყურებინა ამ ყველაფრისთვის და მივიღე გადაწყვეტილება, რომ შიმშილობა შევწყვიტო მეთქი.
რაღაც პერიოდის მერე დაიწყო ფსიქოლოგიური ზეწოლა შვილის მოკვლაზე, ოჯახის წევრების განადგურებაზე. ოჯახის წევრების ფოტოებს დაგილაგებენ წინ და გესაუბრებიან, თითოეული სად მიდის, სკოლაში როგორ წავიდა სკოლაში“, – განაცხადა გიორგი აბდალაძემ.
პარლამენტის დროებითმა საგამოძიებო კომისიამ გიორგი აბდალაძეს „ფოტოგრაფების საქმეზე“ 30 აპრილს მოუსმინა.