ინდოეთსა და პაკისტანს შორის ცეცხლის შეწყვეტის შესახებ შეთანხმება ძალაში რჩება, იმის მიუხედავად, რომ ქვეყნებმა ერთმანეთი დოკუმენტის დარღვევაში დაადანაშაულეს.
Reuters-ის ინფორმაციით, კვირის დილისთვის ქაშმირში საბრძოლო მოქმედებები საზღვრის ორივე მხარეს შეწყდა. გასულ ღამეს შეწყვეტილი ელექტრომომარაგება აღდგენილია. ამასთან, აშშ-ის პრეზიდენტმა დონალდ ტრამპმა განაცხადა, რომ იმუშავებს ქაშმირის საკითხის გადაწყვეტის მეთოდებზე. მან ასევე შეაქო ორივე ქვეყნის ხელმძღვანელობა კონფლიქტის შეწყვეტის გამო.
„ეს არ იყო განხილული, თუმცა, ამ ორივე დიდებულ ერთან გავზრდი ვაჭრობას. დამატებით, ორივესთან ვიმუშავებ, რათა გავარკვიოთ შეიძლება თუ არა, ვიპოვოთ გამოსავალი ქაშმირთან დაკავშირებით“, – დაწერა ტრამპმა საკუთარ სოციალურ ქსელში Truth Social.
ინდოეთსა და პაკისტანს შორის ბრძოლები 4 დღის განმავლობაში გრძელდებოდა.