„ასოშიეთედ პრესის“ ცნობით, ახალარჩეული რომის პაპი ლეო XIV პირველ მიმართვაში უკრაინაში „სამართლიანი და მყარი მშვიდობისკენ“ და ღაზის სექტორში ცეცხლის დაუყოვნებლივი შეწყვეტისკენ მოწოდებით გამოვიდა.
ლეო XIV-მ წმინდა პეტრეს მოედანზე შეკრებილი ხალხისადმი მიმართვაში განაცხადა, რომ კვლავ მიმართავს მსოფლიოს დიდ ქვეყნებს მოწოდებით – „აღარადროს იყოს ომი“.
„ჩემს გულში ვატარებ საყვარელი უკრაინელი ხალხის ტანჯვას“, – განაცხადა რომის პაპმა, რომელიც ამავე გამოსვლაში სამხედრო ტყვეების გათავისუფლებისა და უკრაინელი ბავშვების ოჯახებთან დაბრუნების მოწოდებით გამოვიდა.
ლეო XIV-მ თავის მიმართვაში ასევე ისაუბრა ღაზის სექტორში მიმდინარე ომზე. პონტიფიკოსი თავის სიტყვაში გამოვიდა მოწოდებით, რომ საბრძოლო მოქმედებები დაუყოვნებლივ შეწყდეს, აღდგეს მოქალაქეებისთვის ჰუმანიტარული დახმარების მიწოდება და ყველა მძევალი გათავისუფლდეს.
გარდა ამისა, რომის პაპი მიესალმა ინდოეთსა და პაკისტანს შორის ცეცხლის შეწყვეტის შესახებ შეთანხმებას.
„ასოშიეთედ პრესის“ ცნობით, პონტიფიკოსის პირველი მიმართვის მოსასმენად მოედანზე დაახლოებით 100 ათასი ადამიანი შეიკრიბა.
ახალი რომის პაპი კონკლავმა 8 მაისს აირჩია. 267-ე პაპი გახდა ამერიკელი რობერტ პრევოსტი. ის გახდა აშშ-ის პირველი წარმომადგენელი, რომელიც სათავეში ჩაუდგა რომის კათოლიკურ ეკლესიას.