ევროკავშირთან ურთიერთობის დალაგებისთვის, პირველ რიგში ეს ორმაგი სტანდარტი უნდა მოიშალოს. როცა მუქარით და შანტაჟის ენით გელაპარაკებიან და თან უნდათ, რომ მათთან იმეგობრო და პარტნიორობა გაუწიო, ეს შეუძლებელია. როცა დავინახავთ ჩვენ მათგან, რომ ისინი გვიყურებენ, როგორც თანასწორუფლებიან სახელმწიფოს, ღირსეულ ხალხს, რადგან ამ ყველაფერს ზურგს უმაგრებს ჩვენი ძალიან დიდი ისტორიული წარსული. ჩვენი ისტორიული გზა მიემართება ევროპისკენ, – განაცხადა გადაცემაში „იმედი LIVE“ საპარლამენტო უმრავლესობის წევრი გიორგი სოსიაშვილმა.
„როდესაც წინა ხელისუფლების პერიოდში სტრატეგიული ობიექტები გადაეცა ოკუპანტ სახელმწიფოს, რუსეთს, ხმა არ ამოუღია არც ერთ ევროპელ ბიუროკრატს და მაღალჩინოსანს. ახლა თითქოს ჩვენ ვართ პრორუსული ორიენტაციის ხელისუფლება. ეს ხომ არის აბსოლუტურად დიდი სიყალბე. ამ სიყალბეში ჩვენ ვერანაირად ვერ შევალთ. ჩვენთვის ევროპა არის სამართლიანობის, ადამიანის უფლებებზე და სხვადასხვა სიკეთეებზე ორიენტირებული სივრცე. კონსტიტუციაში გაცხადებულია ჩვენი ბუნებრივი გზა, ევროპულ სივრცეში ინტეგრაციის გზა, მაგრამ ეს უნდა იყოს დამოკიდებული თანასწორუფლებიანობაზე და იმ პატივისცემაზე, რასაც იმსახურებს ჩვენი ქვეყანა“, – აღნიშნა გიორგი სოსიაშვილმა.