აშშ-ის პრეზიდენტის, დონალდ ტრამპის განცხადებით, ვაშინგტონი კატარისგან ძვირადღირებული „ბოინგის“ მიღებას გეგმავს, რომელიც პრეზიდენტის თვითმფრინავს ჩაანაცვლებს. „ეს იქნება საჩუქარი, უფასო“, – განაცხადა ტრამპმა. მისივე თქმით, ეს „საჯარო და გამჭვირვალე ტრანზაქცია“ იქნება.
გავრცელებულ განცხადებაში კატარის სამეფო ოჯახი განმარტავს, რომ თვითმფრინავი არ იქნება საჩუქარი, არამედ თეთრ სახლს დროებით გადაეცემა. ტექნიკურად თვითმფრინავს კატარის თავდაცვის სამინისტრო პენტაგონს გადასცემს, რის შემდეგაც ის აღიჭურვება უსაფრთხოების ფუნქციებითა და მოდიფიკაციებით.
CBS News-ის ინფორმაციით კი საპრეზიდენტო ვადის ამოწურვის შემდეგ ტრამპი ხომალდ საპრეზიდენტო ბიბლიოთეკას გადასცემს, რაც მას საშუალებას მისცემს, თვითმფრინავი შემდგომშიც გამოიყენოს. დემოკრატმა კონგრესმენმა რიჩი ტორესმა უკვე მიმართა წარმომადგენელთა პალატას, გამოძიების ჩატარების მოთხოვნით.
დონალდ ტრამპი კატარში დღეს გაემგზავრება.