აშშ-ის სახელმწიფო მდივანმა, მარკო რუბიომ განაცხადა, რომ თალიბანის, როგორც უცხოური ტერორისტული ორგანიზაციის კლასიფიკაცია, ამჟამად კვლავ გადახედვის პროცესშია.
წარმომადგენელთა პალატის საგარეო ურთიერთობათა კომიტეტის წინაშე სიტყვით გამოსვლისას რუბიომ განაცხადა, რომ სახელმწიფო დეპარტამენტი განიხილავს ამას როგორც ავღანეთის მიმართ აშშ-ის პოლიტიკის უფრო ფართო გადაფასების ნაწილს.
„საბოლოო გადაწყვეტილებები მისაღები გვექნება. ეს კლასიფიკაცია, საბოლოო ჯამში, დაფუძნებული იქნება ჰოლისტიკურ მიდგომაზე, თუ როგორი იქნება ჩვენი სამომავლო პოლიტიკა ავღანეთთან დაკავშირებით“, – აღნიშნა მარკო რუბიომ.
რუბიომ დასძინა, რომ მიუხედავად იმისა, რომ ბოლოდროინდელმა დიპლომატიურმა ძალისხმევამ უზრუნველყო დაკავებული ამერიკელების გათავისუფლება, კვლავაც შეშფოთებას იწვევს თალიბანის კავშირები „ალ-ქაიდასთან“ და ქვეყნის შიგნით მოქმედ სხვა შეიარაღებულ დაჯგუფებებთან.
„ჩვენ აშკარად ვიცით, ვინ არიან ისინი და რა გააკეთეს წარსულში. გვსურს, რომ მათგან მეტი თანამშრომლობა ვიხილოთ „ალ-ქაიდასთან და ქვეყნის სხვა ელემენტებთან დაკავშირებით, რომელთა განადგურებაც გვსურს“, – დასძინა მან.