სამწუხაროა, რომ სხვადასხვა ქვეყნის მოქალაქეები არათუ ჩვეულებრივ მონაწილეებად, არამედ აქციების პერიოდში გვევლინებოდნენ ტრენერებადაც, – განაცხადა „ქართული ოცნების” აღმასრულებელმა მდივანმა, საპარლამენტო უმრავლესობის ლიდერმა მამუკა მდინარაძემ აქციებში უცხო ქვეყნების მოქალაქეების მონაწილეობასთან დაკავშირებით.
მისი თქმით, რამდენიმე ადამიანი დაკავებული იყო მათ შორის, პოლიციელების მიმართ ძალისმიერი მეთოდების გამოყენების გამო.
მდინარაძის განცხადებითვე, ნამდვილად არის იმის მხილება, რომ გარე დაფინანსებული აქციები მხოლოდ ფინანსებით კი არა, არამედ ადამიანური რესურსით არის მხარდაჭერილი.
„ნამდვილად მონაწილეობდნენ კი არა, რამდენიმე ადამიანი თუ ათეული არა, არ მახსოვს ზუსტად, დაკავებული იყო მათ შორის, პოლიციელების მიმართ ძალისმიერი მეთოდების გამოყენების გამო. დატრენინგებული ხალხი იყო და სამწუხაროა, რომ სხვადასხვა ქვეყნის მოქალაქეები არათუ ჩვეულებრივ მონაწილეებად, არამედ აქციების პერიოდში გვევლინებოდნენ ტრენერებადაც და ის ადამიანები იყვნენ ჯერ რომლებიც დიდი ფულით დაფინანსებულ ტრენინგებზე ატრენინგებდნენ როგორ უნდა მოქცეულიყვნენ აქციის მონაწილეები, როგორ დაეზიანებინათ სახელმწიფო ინსტიტუტები, პოლიციელები, შემდეგ თავად იღებდნენ მონაწილეობას და პატარ პატარა ჯგუფებს კაპიტნობდნენ კიდეც.
შესაბამისად, ეს უკვე ცნობილი ამბავია და არავისთვის უცხო არ არის. არა მხოლოდ სოციალურ ქსელში, ტელევიზიებშიც ხშირად გადიოდა ახალი ამბები. აქედან გამომდინარე, მათი მოწოდება იმის შესახებ, რომ შეიძლება ძვირად დაუჯდეთ არ ვიცი რა მინიშნებაა, თუმცა, შეგვიძლია ვთქვათ, რომ მხილება ნამდვილად არის იმისა, რომ გარე დაფინანსებული აქციები მხოლოდ ფინანსებით კი არ არის მხარდაჭერილი, არამედ არის ადამიანური რესურსით მხარდაჭერილი. თუმცა, საქართველოს დამოუკიდებლობის ხარისხი დღეს იძლევა იმის მყარ გარანტიას, რომ გარე ჩარევები იმ შედეგს რომელიც მათ სურთ, ანუ, აგენტურის მმართველობას საქართველოში ვერ უზრუნველყოფს.”- განაცხადა მამუკა მდინარაძემ.