პირველი ვიცე-პრემიერი, ეკონომიკისა და მდგრადი განვითარების მინისტრი ლევან დავითაშვილი უნგრეთის ეროვნული ეკონომიკის მინისტრს მარტონ ნაგის შეხვდა, რომელიც საქართველოსა და უნგრეთის მთავრობათაშორისი სამიტის ფარგლებში გაიმართა. შეხვედრაში ასევე მიიღო მონაწილეობა ფინანსთა მინისტრმა ლაშა ხუციშვილმა.
შეხვედრაზე საუბარი წარიმართა ორი ქვეყნის ეკონომიკური თანამშრომლობის პრიორიტეტულ მიმართულებებზე. აღინიშნა, რომ საქართველოსა და უნგრეთის ურთიერთობა სამაგალითოა რეგიონში და ხელს უწყობს სტაბილურობისა და მშვიდობის შენარჩუნებას. მხარეებმა მაღალი შეფასება მისცეს საქართველოსა და უნგრეთის მთავრობათაშორის სამიტის ჩატარებას, რომელიც კიდევ უფრო შეუწყობს ხელს ქართველი და უნგრელი ხალხების დაახლოებას.
პირველმა ვიცე-პრემიერმა უნგრელ კოლეგას გააცნო საქართველოს ეკონომიკის ტენდენციები, აგრეთვე ინფორმაცია მიაწოდა მიმდინარე და დაგეგმილი მსხვილი ინფრასტრუქტურული პროექტების შესახებ, რომლებიც ხელს შეუწყობს საქართველოს თანამშრომლობას რეგიონის სხვა ქვეყნებთან. განსაკუთრებული აქცენტი გაკეთდა შავი ზღვის წყალქვეშა კაბელის პროექტი, რომლის წარმატებული განხორციელება დიდ გავლენას მოახდენს რეგიონის ენერგეტიკულ უსაფრთხოებაზე, ასევე ხელს შეუწყობს განახლებადი ენერგიის სექტორის განვითარებასა და ამ სფეროში რეგიონთაშორისი სატრანზიტო შესაძლებლობების გაზრდას.
შეხვედრაზე დადებითად შეფასდა თანამშრომლობა ორმხრივი ვაჭრობის, ტრანსპორტისა და ლოგისტიკის, ტურიზმის, სამოქალაქო ავიაციისა და სხვა სექტორებში. აღინიშნა, რომ ბოლო წლებში გაიზარდა როგორც სავაჭრო ბრუნვა ქვეყნებს შორის, ასევე ექსპორტი, ასევე ხაზი გაესვა ნაყოფიერ თანამშრომლობას სამოქალაქო ავიაციის სექტორში – 2025 წელს უნგრეთის ავიაკომპანიამ WizzAir – მა საქართველოს საავიაციო ბაზარზე ყველაზე მეტი მგზავრი გადაიყვანა და ამ მაჩვენებლით პირველი ადგილი დაიკავა.
შეხვედრაზე ასევე ხაზი გაესვა თანამშრომლობის ხელშეწყობას ორი ქვეყნის კერძო სექტორებს შორის, მეტი სავაჭრო მისიებისა და ბიზნეს ფორუმების გამართვას.
შეხვედრის დასრულების შემდეგ, მთავრობათაშორისი კომისიის სხდომაზე ხელი მოეწერა საქართველოს ეკონომიკისა და მდგრადი განვითარების სამინისტროსა და უნგრეთის კულტურისა და ინოვაციების სამინისტროს შორის ურთიერთგაგების მემორანდუმს, რომელმაც ხელი უნდა შეუწყოს ქვეყნებს შორის ტექნოლოგიების, კვლევებისა და ინოვაციების სფეროებში თანამშრომლობის გაღრმავებას.
