პარლამენტის პლენარულ სხდომაზე ეროვნული ბანკის პრეზიდენტმა ნათია თურნავამ საქართველოს ეროვნული ბანკის (სებ-ის) 2024 წლის წლიური ანგარიში წარადგინა. ანგარიშის წარდგენისას ნათია თურნავამ ყურადღება გაამახვილა: მაკროეკონომიკურ გარემოზე, ეკონომიკურ ზრდაზე, ფულად-საკრედიტო და სავალუტო პოლიტიკაზე, საბანკო ზედამხედველობაზე, მომხმარებელთა უფლებების დაცვაზე, არასაბანკო დაწესებულებების ზედამხედველობაზე, ნორმატიულ-სამართლებრივი ბაზის განვითარებასა და სხვა საკითხებზე.
„საქართველოს ეროვნული ბანკის შესახებ“ საქართველოს ორგანული კანონის თანახმად, ეროვნული ბანკის ძირითად ამოცანას ფასების სტაბილურობის უზრუნველყოფა წარმოადგენს, რაც გრძელვადიანი ეკონომიკური კეთილდღეობის წინაპირობაა. აღნიშნული მიზნის მისაღწევად ეროვნული ბანკი მონეტარულ (ფულად-საკრედიტო) პოლიტიკას ინფლაციის თარგეთირების რეჟიმით ახორციელებს, რომლის პირობებშიც წინასწარ განისაზღვრება ინფლაციის მიზნობრივი დონე, რომელიც ამჟამად 3 პროცენტს შეადგენს“, – განაცხადა ეროვნული ბანკის პრეზიდენტმა.
ნათია თურნავას თქმით, საქართველოში 2024 წელსაც დაბალინფლაციური გარემო შენარჩუნდა. ეროვნული ბანკის მონეტარული პოლიტიკის შედეგად, 2024 წელს ინფლაცია სტაბილურად მიზნობრივი მაჩვენებლის ფარგლებში იყო და საშუალოდ 1.1 პროცენტი შეადგინა.
„საქართველოს ეროვნული ბანკის „ფულის გათეთრებისა და ტერორიზმის დაფინანსების წინააღმდეგ ბრძოლის საზედამხედველო ჩარჩოს“ შესაბამისად, 2024 წლის რისკზე დამყარებული საზედამხედველო სტრატეგიის ფარგლებში, დაიგეგმა და განხორციელდა ღონისძიებები, რომელსაც როგორც სექტორული, ისე თითოეული ფინანსური ინსტიტუტის რისკების დისტანციური ფორმით იდენტიფიცირებისა და შეფასების პროცესი დაედო საფუძვლად. 2024 წლის განმავლობაში განხორციელებული საზედამხედველო ღონისძიებები მოიცავდა როგორც კომპლექსურ, ისე თემატურ, სპეციალურ, საკონტროლო და სწრაფი ტიპის ადგილზე შემოწმებებს“, – განაცხადა ნათია თურნავამ.
მისივე თქმით, ეროვნული ბანკი დიდ ყურადღებას უთმობს საქართველოს საბანკო სექტორში საოპერაციო რისკების ცნობიერების ამაღლებას, საოპერაციო რისკების მართვის გაფართოებასა და საზედამხედველო პრინციპების განვითარებას.
ანგარიშის თანახმად, 2024 წლის 31 დეკემბრის მდგომარეობით, არასაბანკო საფინანსო სექტორი წარმოდგენილია 31 მიკროსაფინანსო ორგანიზაციით 418 ლოკაციაზე, 158 სესხის გამცემი სუბიექტით 296 ლოკაციაზე, 505 19 ვალუტის გადამცვლელი პუნქტით 713 ლოკაციაზე და 1 საკრედიტო კავშირით.
ეროვნული ბანკის პრეზიდენტის ინფორმაციით, გასული წლების მსგავსად, მომხმარებელთა უფლებების დაცვა საქართველოს ეროვნული ბანკისთვის 2024 წელსაც კვლავ ერთ-ერთ პრიორიტეტულ მიმართულებას წარმოადგენდა. ამ კუთხით წლის განმავლობაში დაიხვეწა არსებული საკანონმდებლო ჩარჩო, კერძოდ, მნიშვნელოვანი ცვლილებები განხორციელდა ფინანსური ორგანიზაციების მიერ მომსახურების გაწევისას მომხმარებელთა უფლებების დაცვის წესში, ხოლო სექტორში საუკეთესო საერთაშორისო პრაქტიკის დანერგვის მიზნით მიმდინარეობდა ფინანსურ სექტორთან შესაბამისი კონსულტაციები და სამუშაო შეხვედრები.