“აფხაზებთან მოლაპარაკების საფუძველზე 300 მოხუცი წამოვიყვანე, ვბრუნდები სოხუმში და ვუყურებ გია ბარამიძის ინტერვიუს, რა სირთულეები გადახდა ამ 300 ადამიანის გამოყვანაზე”

აფხაზებთან მოლაპარაკების საფუძველზე გადაწყდა, რომ 300-300-ზე მოსახლეობა გაგვეცვალა და რატომღაც გადაწყვიტეს, რომ მე გავეშვი ამ გაცვლაზე. გამომაყოლეს ჟურნალისტი, ქალბატონი ირინა გოგოსაშვილი, პაატა ზაქარეიშვილი. სოფელ-სოფელ ადამიანები რომ მეძებნა და გემში შემეკრიბა. თუ დამიჯერებთ, ეს ომზე უარესი იყო, იმიტომ, რომ მიდიხარ ოჯახში, ადამიანს ჰპირდები, რომ ხვალ წაგიყვან, მეორე დღეს წამოსაყვანად მიდიხარ და ის მოხუცი ლოგინში ჩაცხრილული გხვდება, შენ უნდა დამარხო, – ამის შესახებ ვეტერანმა მალხაზ თოფურიამ, პარლამენტის დროებითი საგამოძიებო კომისიის სხდომაზე განაცხადა.

როგორც მან აღნიშნა, საბოლოოდ, მოახერხა სამასი მოხუცის წამოყვანა, სოხუმში ჩამოსულმა კი ნახა გიორგი ბარამიძის ინტერვიუ, რომელიც ყვებოდა, თუ რა სირთულეები გადახდა ამ სამასი ადამიანის ჩამოყვანის დროს. თოფურიას თქმით, ბარამიძემ ეს ყველაფერი იმით ახსნა, რომ საკუთარ თავზე, დოკუმენტურ ფილმს „გია ბარამიძე“ იღებდა.

„იქ ისეთი სენტიმენტალური სცენებიც ვნახე, აფხაზი მოვიდა ჩუმად, ერთ ოჯახს ჩემთან, სარდაფში ვმალავ, იციან, იმათი შვილი რომ იბრძვისო და სარდაფიდან წამოგვიყვანა პირდაპირ ოჯახი. მერე ხშირად არ გვიჯერებდნენ- გავრცელდა ჭორი, რომ გემში ჩაგვსვამენ, ჩვენი დამარხვით რომ არ იწვალონ და ჩაგვძირავენო. 300 მოხუცი წამოვიყვანე, თან დაცვა დამყვებოდა, იმიტომ, რომ ხშირად იყო სურვილი, ვიღაცას „მივეხვრიტე“, იმდენად მე არ მეშინოდა, იმიტომ, რომ 5 აფხაზი დადიოდა სოხუმში, შეთანხმების მიხედვით, ერთსაც რომ რამე დამართნოდა, მე დავიხვრიტებოდი და პირიქით. ჯოჯოხეთი გამოვიარეთ, ვბრუნდები სოხუმში და ფსიქიურად მართლა ცუდად ვარ. სოსო მარგიშვილი იყო პრესცენტრის უფროსი, ვინც ყოველ დილით ინფორმაციებს გვაძლევდა და უცბად, გია ბარამიძის ინტერვიუს ვუყურებ, ყვება რა სირთულეები გადახდა ამ 300 ადამიანის გამოყვანაზე. სოსო გაგიჟდა, პაატაც [ზაქარეიშვილი] იქ იყო, თუ არ ვცდები, ბარამიძე აეროპორტში იძლეოდა ინტერვიუს და მოიყვანეთო – მოიყვანეს და გეხვეწებით, თქვენ ფეხებზე გკიდიათ და მე სამომავლოდ დოკუმენტურ ფილმს „გია ბარამიძეს“ ვიღებო. დეპუტატი იყო, მაგას სხვადასხვა ეტაპები ჰქონდა, ერთხელ თქვა, რომ შევარდნაძის ერთგულ ჯარისკაცად მოვკვდებიო, მერე ჟვანიას ერთგულ ჯარისკაცად კვდებოდა და დღეს – სააკაშვილის. არ გრცხვენიაო, და დაანებეთ თავი-მეთქი, ასეთ წაქცეულ ადამიანს რა უნდა უთხრა, რომელიც თავის თავზე დოკუმენტურ ფილმს იღებს და რაღაცებს იბრალებს. რაღა შორს წავიდეთ, [სააკაშვილს] გუნდში ჰყავდა ერთადერთი ნაომარი კაცი, ნათელ-მირონი და ცემაში მოაკვლევინა – კობა დავითაშვილი იყო სანგარში რომ იჯდა, ისეთი ჯარისკაცი.“ – განაცხადა მალხაზ თოფურიამ.