ლიეტუვაში ფერმერები საგადასახადო რეფორმას აპროტესტებენ, აქციის მონაწილეები სეიმის წინ შეიკრიბნენ.
ლიტუველი ფერმერები აცხადებენ, რომ დაგეგმილმა ცვლილებებმა შესაძლოა, მნიშვნელოვნად იმოქმედოს სოფლის მეურნეობის სექტორზე და სურსათის ფასების ზრდა გამოიწვიოს. ამავდროულად, ფერმერთა საზოგადოების ნაწილმა პროტესტისგან დისტანცირება მოახდინა და განაცხადა, რომ ეს მხოლოდ მდიდარი ფერმერების მცდელობაა, შეინარჩუნონ სტატუსკვო და თავიდან აიცილონ სამართლიანი დაბეგვრა.
ადგილობრივი მედიის ინფორმაციით, მიუხედავად იმისა, რომ სეიმში უძრავი ქონების გადასახადისა და პირადი საშემოსავლო გადასახადის შესახებ კანონების განხილვა მომავალ კვირამდე გადაიდო, ფერმერები პარლამენტის წინ მაინც შეიკრიბნენ.
საპროტესტო აქციის ორგანიზატორები აცხადებენ, რომ მთავრობა ფერმერების წინადადებებსა და შეშფოთებას დაგეგმილ საგადასახადო ცვლილებებთან დაკავშირებით უგულებელყოფს.