ჩვენ უნდა დავიცვათ ის კანონები, რომელიც ჩვენს ქვეყანაში მოქმედებს. კანონმა უნდა იკანონოს, – განაცხადა რეგიონული პოლიტიკისა და თვითმმართველობის კომიტეტის თავმჯდომარემ ირაკლი ქადაგიშვილმა „დღის ქრონიკაში“ პარლამენტის საგამოძიებო კომისიაზე ოპოზიციის ზოგი ლიდერის გამოუცხადებლობის ფაქტზე საუბრისას.
„თუ არ მოექცა საბოლოო ჯამში პოლიტიკა, არასამთავრობო სექტორი, მედია, საზოგადოება დემოკრატიული კანონების აღსრულებისა და პატივისცემის პროცესში, წინააღმდეგ შემთხვევაში ქვეყანა მუდმივად, სხვადასხვა მიზეზით, სხვადასხვა საჭიროებიდან გამომდინარე იქნება გარე თუ შიდა პოლიტიკური ძალების მხრიდან მუდმივი რყევებისა და დესტაბილიზაციის არენა“, – აღნიშნა ირაკლი ქადაგიშვილმა.
საქართველოს წინააღმდეგ საბოტაჟისა და მტრულ საქმიანობაში დახმარების საქმეზე, მათ შორის, ჩორჩანას საგუშაგოს ეპიზოდთან დაკავშირებით გენერალურ პროკურატურაში გამოკითხვები გრძელდება. ამ საკითხზე იმდროინდელ შს მინისტრს, გიორგი გახარიას საქართველოს პარლამენტში დროებითი საგამოძიებო კომისიის სხდომაზე კიდევ ერთხელ იბარებენ.
პარლამენტის დროებითი საგამოძიებო კომისიის სხდომაზე ასევე კიდევ ერთხელ დაიბარეს მამუკა ხაზარაძე. კომისიის მიმართვა ხაზარაძემ სოციალურ ქსელში თავად გაასაჯაროვა და დაწერა, რომ კომისიის სხდომაზე მისვლას არ აპირებს.