კატარის საგარეო საქმეთა სამინისტროს სპიკერმა, მაჯედ ალ-ანსარიმ აშშ-ს ავიაბაზაზე, ალ-უდეიდზე ირანის თავდასხმა დაგმო და აღნიშნა, რომ კატარი პასუხის გაცემის უფლებას იტოვებს.
ამასთან, სამინისტროს სპიკერის ცნობით, ავიაბაზის პერსონალის უსაფრთხოების უზრუნველსაყოფად ყველა ზომა მიიღეს და თავდასხმამდე ბაზის ევაკუაცია მოხდა. მისივე თქმით, არავინ დაღუპულა ან დაშავებულა.
“კატარის სახელმწიფო მტკიცედ გმობს ირანის რევოლუციური გვარდიის თავდასხმას, რომელმაც მიზანში ალ-უდეიდის ავიაბაზა ჰქონდა ამოღებული. ამას კატარის სახელმწიფოს სუვერენიტეტის, მისი საჰაერო სივრცის, საერთაშორისო სამართლისა და გაეროს ქარტიის შემზარავ დარღვევად მივიჩნევთ. ვადასტურებთ, რომ კატარი იტოვებს საერთაშორისო სამართალთან შესაბამისად ამ უტიფარი აგრესიის ბუნებისა და მასშტაბის ტოლფასი პასუხის გაცემის უფლებას.
კატარის ჰაერსაწინააღმდეგო თავდაცვის სისტემებმა თავდასხმა ჩაშალეს და ირანული რაკეტები ჩამოაგდეს. თავდასხმის გარემოებების შესახებ დეტალურ განცხადებას მოგვიანებით თავდაცვის სამინისტრო გაავრცელებს.
მანამდე, ბაზის ევაკუაცია მოხდა რეგიონში დაძაბულობის გათვალისწინებით დამკვიდრებული უსაფრთხოებისა და წინასწარი სიფრთხილის ზომების შესაბამისად. ყველა საჭირო ნაბიჯი გადაიდგა, რათა ბაზის პერსონალის, მათ შორის კატარის შეიარაღებული ძალების წევრების, მეგობრული ძალებისა და სხვათა უსაფრთხოება უზრუნველყოფილი ყოფილიყო. ვადასტურებთ, რომ თავდასხმის შედეგად არავინ დაშავებულა და არ დაღუპულა”. – წერს ალ-ანსარი.
განცხადებაში ასევე აღნიშნულია, რომ კატარი სამხედრო ქმედებების დაუყოვნებლივ შეწყვეტისკენ მოუწოდებს და მიიჩნევს, რომ მშვიდობიანი დიალოგი კრიზისის გადალახვის ერთადერთი გზაა.
“ასევე ხაზს ვუსვამთ, რომ ასეთი ესკალაციური სამხედრო ქმედებების გაგრძელება რეგიონის უსაფრთხოებასა და სტაბილურობას ძირს გამოუთხრის და ჩაითრევს სიტუაციებში, რომლებსაც საერთაშორისო მშვიდობისთვისა და უსაფრთხოებისთვის კატასტროფული შედეგები შეიძლება ჰქონდეს.
ყველა სამხედრო ქმედების დაუყოვნებლივ შეწყვეტისკენ და მოლაპარაკებების მაგიდაზე და დიალოგისთვის დაბრუნებისკენ მოვუწოდებთ.
გარდა ამისა, კატარის სახელმწიფო ერთ-ერთი პირველი ქვეყანა იყო, რომელიც რეგიონში ისრაელის ესკალაციის საფრთხეებზე საუბრობდა. თანმიმდევრულად მოვუწოდებდით, რომ დიპლომატიური გამოსავლებს მიენიჭოს პრიორიტეტი და კეთილმეზობლობისა და ესკალაციისთვის თავის არიდების მნიშვნელობას ხაზს ვუსვამდით.
ხელახლა ვადასტურებთ, რომ დიალოგი ახლანდელი კრიზისი გადალახვისა და რეგიონის უსაფრთხოებისა და მისი ხალხის მშვიდობის უზრუნველსაყოფად ერთადერთი გზა არის”. – წერს ალ-ანსარი