რუსეთში, მოსკოვის შერემეტევოს აეროპორტში ახალგაზრდა მამაკაცმა 2 წლის ბავშვი ხელში აიყვანა, შემდეგ კი მთელი ძალით ძირს დააგდო, რის გამოც ბავშვი კომაში ჩავარდა. ინფორმაციას რუსული მედია ავრცელებს.
მედიის ცნობით, მამაკაცის წინააღმდეგ განზრახ მკვლელობის მცდელობის მუხლით არის საქმე აღძრული.
პოლიციის დეპარტამენტმა ინციდენტის დეტალები დააზუსტა. დანაშაულის ჩადენის დროს მამაკაცი ნარკოტიკული ზემოქმედების ქვეშ იმყოფებოდა. ინციდენტი აეროპორტის ჩამოსვლის ზონაში მოხდა. თავდამსხმელის მიერ ბავშვის დაზიანების შემდეგ, ის თვითმხილველებმა შეაჩერეს.
მედიის ინფორმაციით, თავდამსხმელი 31 წლის ბელორუსის მოქალაქეა. ის ორი წლის ბიჭს მიუახლოვდა, აიყვანა და შემდეგ მთელი ძალით დააგდო იატაკზე. ფაქტის ამსახველი კადრები სათვალთვალო კამერებმა დააფიქსირეს.
პირველადი დახმარების მიუხედავად, მცირეწლოვანი ბიჭი კომაში ჩავარდა. საავადმყოფოში, სადაც არასრულწლოვანია მოთავსებული, მას თავის ტვინის დაზიანება დაუდგინდა.
დაკავებულ მამაკაცს 20 წლამდე ვადით პატიმრობა ემუქრება.