აშშ-ის პრეზიდენტის სპეციალურმა წარმომადგენელმა ახლო აღმოსავლეთში, სტივ უიტკოფმა ირანის განადგურებული ბირთვული ობიექტების შესახებ მედიაში გავრცელებულ დაზვერვის მასალებს ღალატი უწოდა.
„ეს აღმაშფოთებელია, ღალატია და ეს უნდა იყოს გამოძიებული. ვინც არ უნდა იყოს პასუხისმგებელი, პასუხისგებაში უნდა მიეცეს“, – თქვა უიტკოფმა.
დიპლომატმა აგრეთვე დასძინა, რომ ირანის ბირთვული ობიექტებისთვის მიყენებული ზიანის შესახებ ყველა ანგარიში შეისწავლა და „ეჭვგარეშეა“, რომ სამივე ბირთვული ობიექტი, რომელზეც აშშ-მა იერიში მიიტანა, განადგურებულია.
ცნობისთვის, გუშინ ტელეკომპანია CNN-მა ინფორმირებულ წყაროზე დაყრდნობით გაავრცელა ინფორმაცია იმის შესახებ, რომ ირანის სამ ბირთვულ ობიექტზე აშშ-ის სამხედრო დარტყმებმა ქვეყნის ბირთვული პროგრამის ძირითადი კომპონენტები ვერ გაანადგურა და, სავარაუდოდ, მხოლოდ რამდენიმე თვით უკან დახია იგი.