მედიათავისუფლება იმით არ განისაზღვრება, რომ ჟურნალისტს ყველა უწყებაში შესვლა და ყველა პროცესის გაშუქება უნდა შეეძლოს, არც პარლამენტში ვემხრობი იმას, როცა ჟურნალისტი დერეფნებში დეპუტატებს დასდევს, კაბინეტებში იჭრება და ა.შ, – ამის შესახებ „ხალხის ძალის“ წევრმა, გურამ მაჭარაშვილმა განაცხადა.
მაჭარაშვილის თქმით, დაგეგმილი საკანონმდებლო ცვლილებები ადაპტირებული და აპრობირებულია ნებისმიერ ცივილიზებულ ქვეყანაში.
„რომელ ცივილიზებულ, დემოკრატიულ და ევროპულ ქვეყანაშია ასე, სადაც ჟურნალისტი დერეფან-დერეფანში, კაბინეტ-კაბინეტ დადის საკანონმდებლო ორგანოში? – მართლმსაჯულებასა და სასამართლო პროცესებზე აღარაფერს ვამბობ. სად შეუძლია ჟურნალისტს პროცესზე ნებისმიერ დროს შევიდეს, გააშუქოს, მათ შორის – იძალადოს და ა.შ. ასეთი რაღაც არც ერთ ქვეყანაში არ ხდება. ვცდილობთ, ლიბერალური „დიფ სთეითიდან“ თავსმოხვეული კანონმდებლობა შევცვალოთ და ევროპულ ღირებულებას დავუბრუნდეთ. ევროპულ ქვეყნებში ჟურნალისტს ცივილიზებულად აქვს გაშუქების უფლება, მაგრამ არა ყველგან შესვლის უფლება. აქედან გამომდინარეა, ზუსტად ეს ცვლილებები, რაც ადაპტირებული და აპრობირებულია ნებისმიერ ცივილიზებულ ქვეყანაში. კითხვა – არის თუ არა ეს მედიის შეზღუდვა? უნდა გვესმოდეს, რას ნიშნავს სიტყვა „შეზღუდვა“. შეზღუდვა მაშინ შეიძლება გამოვიყენოთ, როცა საერთაშორისო სტანდარტს ზღუდავ. ევროპული ქვეყანა დამისახელეთ, სადაც პარლამენტში დეპუტატებს და მოსამართლეებს ასე დასდევენ. პროცესებსაც ისე აშუქებენ, როგორც საქართველოში. ასეთ ევროპულ ქვეყანას ვერც დამისახელებთ. ჩვენ ევროპისკენ მივდივართ და ისეთი კანონმდებლობა გვინდა, როგორიც ევროპის წამყვან ქვეყნებშია. ვნახეთ, სასამართლოს ეზოები რისთვის გამოიყენეს. დაპირისპირების ცენტრი, აქციების ადგილი გახადეს. გადახედეთ სოციალურ ქსელს – „შევიკრიბოთ სასამართლოს ეზოში“. რას ნიშნავს ეს? – ქვეყნის მაგალითი დამისახელეთ, სადაც სასამართლო შენობის წინ აქცია დაანონსდა, დროშების ფრიალი დაიწყო და ა.შ. როდესაც ძალადობრივი აქციის მონაწილეებმა იციან, რომ იქ მედიასაშუალება იქნება, ამიტომ მიდიან დაპირისპირებაზე“, – განაცხადა მაჭარაშვილმა.