ევროკომისიის პრეზიდენტს, ურსულა ფონ დერ ლაიენს COVID-19 პანდემიასთან დაკავშირებული სკანდალის გამო უნდობლობის გამოცხადება ემუქრება, რამაც, შესაძლოა, მეორე ვადით მისი პოლიტიკური გეგმები დაასრულოს. ინფორმაციას The Financial Times-ი ავრცელებს.
ევროპარლამენტის „მემარჯვენე“ დეპუტატები ამტკიცებენ, რომ მათ საკმარისი მხარდაჭერა მოიპოვეს, რათა ევროკომისიის პრეზიდენტის გადაყენების პროცედურა გააგრძელონ მას შედეგ, რაც სასამართლომ ფონ დერ ლაიენი ფარმაცევტული კომპანიის დირექტორთან პირადი მიმოწერის საქმეზე დამნაშავედ ცნო.
მიუხედავად იმისა, რომ ფონ დერ ლაიენი, უნდობლობის გამოცხადებას, რომელიც მომდევნო თვეს გაიმართება, გადაურჩება, ამ გარემოებამ, შესაძლოა, ის აიძულოს წავიდეს ახალ კომპრომისებზე როგორც „მემარცხენეებთან“, ისე „მემარჯვენეებთან“, რათა მათი მხარდაჭერა მოიპოვოს.
როგორც ევროპარლამენტის რუმინელმა „მემარჯვენე“ დეპუტატმა გეორგე პიპერამ The Financial Times-ს განუცხადა, წინადადებას უნდობლობის გამოცხადების შესახებ ის ხუთშაბათს შეიტანს, მას შემდეგ, რაც საჭირო 72 ხელმოწერას დააგროვებს.
„ინიციატივა, პირველ რიგში, მიმართულია გამჭვირვალობისა და სამართლიანი და ნამდვილი დემოკრატიული პროცესის მხარდაჭერისკენ“, – თქვა ევროპარლამენტარმა.
გამოცემის მტკიცებით, უნდობლობის გამოცხადების პროცედურის ინიციირებას არც თუ ბევრი დეპუტატის მხარდაჭერა სჭირდება, თუმცა ფონ დერ ლაიენის გადაყენებას ევროპარლამენტარების 2/3-ზე მეტი ხმა დასჭირდება. დღეს ევროპარლამენტში 720 დეპუტატია. ერთი წლის წინ 401 ევროპარლამენტარმა ფონ დერ ლაიენის მეორე ვადით არჩევას ხმა მისცა.
ცნობისთვის, ევროკავშირის სასამართლომ მიმდინარე წლის მაისში ევროკომისიის პრეზიდენტი 2021-2023 წლებში COVID-19 საწინააღმდეგო ვაქცინების შესყიდვის შესახებ წარმოებული მოლაპარაკებების შესახებ ინფორმაციის დამალვის გამო დამნაშავედ ცნო.