თავდაცვისა და უშიშროების საპარლამენტო კომიტეტის თავმჯდომარის პირველი მოადგილე თენგიზ შარმანაშვილი გამოეხმაურა სიტყვისა და გამოხატვის თავისუფლების შესახებ კანონში ახალ ინიციატივას, რომელიც ცილისმწამებელს ბრალის მტკიცების ვალდებულებას აკისრებს. მისი განცხადებით, ამ ცვლილებით საქართველო ევროპულ მიდგომაზე გადადის.
„უპასუხისმგებლოდ გაავრცელო ინფორმაცია, გადაუმოწმებლად ან წინასწარი განზრახვით დასწამონ ცილი ადამიანს და მერე იძახონ, რომ მან ამტკიცოს, რომ ის მართალია, ეს იყო არასწორი მიდგომა და ჩვენ გადავდივართ ევროპულ მიდგომაზე. ეს ევროპისთვის სიახლე არ არის. ის დაუსრულებელი ცილისწამებები, რომლებიც აქამდე გაისმოდა ყოვლად უპასუხისმგებლოდ, ყოველგვარი დასაბუთების გარეშე, ასე ვეღარ იქნება. რა თქმა უნდა, თუ ამბობ ვინმეზე რამეს, მაშინ კეთილი ინებე და თუ გიჩივლებენ სასამართლოში, მიიტანე მტკიცებულებები”, – განაცხადა თენგიზ შარმანაშვილმა.
სიტყვისა და გამოხატვის თავისუფლების შესახებ კანონში ახალ ინიციატივას, რომელიც ცილისმწამებელს ბრალის მტკიცების ვალდებულებას აკისრებს, დღეს პარლამენტი მეორე მოსმენით უყრის კენჭს.
ცვლილებების თანახმად, ზუსტდება ცილისწამების განმარტება. თუ აქამდე მტკიცების ტვირთი ცილისწამების ობიექტზე იყო, ცვლილების შედეგად, მტკიცების ტვირთი გადადის ცილისმწამებელზე.