ის სააკაშვილს ხელს უწვდის, ხაზარაძეს ჯერ ერჩის, მერე ეფერება იმისთვის, რომ კარგად იყოს, ეს ძალიან იაფფასიანი და წამგებიანი პოლიტიკური ნაბიჯებია, რაც არასერიოზულად გამოიყურება, – განაცხადა ელისაშვილზე საუბრისას ფრაქცია „ქართული ოცნების“ თავმჯდომარის მოადგილემ, ირმა ზავრადაშვილმა.
მისივე თქმით, ე.წ. ოპოზიციის ყველა ლიდერმა იცოდა, რომ ამ არჩევნებში ვერ გაიმარჯვებდა მარტივი მიზეზის გამო.
„მოსახლეობისა ამომრჩევლის განწყობა იცის ყველამ. შეუძლებელია, პოლიტიკაში, თუნდაც ელემენტარული ქმედებებით იყო დაკავებული და ვერ მიხვდე, საზოგადოება და ამომრჩეველი შენს მიმართ როგორაა განწყობილი. ამას არ სჭირდება დიდი საარჩევნო კამპანია, მათ შორის, ელისაშვილიც – თუმცა, ელისაშვილის აღიარებითი ჩვენების ნაწილში მე არასერიოზულად ვუყურებ ამას. ის, ვინც სააკაშვილს ხელს უწვდის, ის, ვინც ხაზარაძეს ჯერ ერჩის, მერე ეფერება იმისთვის, რომ კარგად იყოს, ეს ძალიან იაფფასიანი და წამგებიანი პოლიტიკური ნაბიჯებია, რაც არასერიოზულად გამოიყურება“, – განაცხადა ზავრადაშვილმა.
კოალიცია „ძლიერი საქართველოს“ წევრი ალეკო ელისაშვილი თვითმმართველობის არჩევნებში მონაწილეობას აანონსებს. ერთ-ერთ გადაცემაში მან ასევე ისაუბრა 2024 წლის საპარლამენტო არჩევნებამდე საკუთარ მოლოდინებზეც. როგორც ელისაშვილმა განაცხადა, მან არჩევნებამდეც იცოდა, რომ მეოცე ნომრით პარლამენტში ვერ მოხვდებოდა, რაც ეწინააღმდეგება ოპოზიციური სპექტრის მტკიცებას, თითქოს 2024 წლის არჩევნები გაყალბდა.