მგონი, პეტერ ფიშერმა საბოლოოდ უარი თქვა ელჩობაზე და ჩვეულებრივად იქცა რადიკალური ოპოზიციის ყველაზე რადიკალური ფრთის მხარდამჭერად, – ამის შესახებ საქართველოს პარლამენტის თავმჯდომარემ, შალვა პაპუაშვილმა ჟურნალისტებს განუცხადა.
როგორც პაპუაშვილმა აღნიშნა, პეტერ ფიშერი გერმანიას არ წარმოადგენს.
„ელენე ხოშტარია არა მხოლოდ რადიკალი ოპოზიციონერია, ამავე დროს არის ექსტრემისტი ოპოზიციონერი, რომელიც გამოირჩევა იმით, რომ პატივს არ სცემს დემოკრატიულ ინსტიტუტებს, ადამიანის უფლებებს, ადამიანის ღირსებას, არაფერს, რაც კი შეიძლება შედიოდეს პოლიტიკოსის დადებით თვისებაში. როდესაც ვხედავთ, რომ ელჩი მივიდა, თან შემდეგ სცადა, რომ გაემართლებინა თავისი სოლიდარობა იმით, თითქოს ეს იყო მხოლოდ თანაგრძნობა და ემპათია, რის მიმართ იყო ეს თანაგრძნობა, იმის მიმართ, რომ ადამიანი ამბობს, თავს მოიკლავს, თუკი რაღაც არ მოხდება? ეს არის ევროპული გაგება დემოკრატიის? რის მიმართ აქვს მას ეპმათია, რომ ადამიანი მოუწოდებს ოპოზიციას, საბოტაჟი გამოუცხადოს არჩევნებს? ეს არის მისი გაგება დემოკრატიის? ფაქტია, რომ ბატონი ფიშერი გერმანიას არ წარმოადგენს, გერმანელი ხალხი ნამდვილად არ არის ამ ღირებულებების მატარებელი, რასაც ბატონი ფიშერი ქართველ ხალხს აჩვენებს. სამწუხაროა, რომ იმ განსაკუთრებულ დამოკიდებულებას, რომელიც ქართველ ხალხს ჰქონდა გერმანიის მიმართ, ჩვენი დამოუკიდებლობის ბოლო 34 წლის განმავლობაში, ეს ერთი ადამიანი ძალიან რუდინებით უთხრის ძირს და აზიანებს ისე, რომ არ ვიცი, ამის გამოსწორებას კიდევ რა დრო დასჭირდება“, – აღნიშნა შალვა პაპუაშვილმა.