საფრანგეთის პრეზიდენტმა, ემანუელ მაკრონმა განაცხადა, რომ ძლიერი ქვეყნების მიერ დაწესებული ტარიფები ხშირად შანტაჟის ფორმაა და არა ვაჭრობის ბალანსის აღდგენის ინსტრუმენტი.
საფრანგეთის ლიდერის კომენტარი, რომელიც მან ესპანეთის ქალაქ სევილიაში გამართულ განვითარების დაფინანსების საერთაშორისო კონფერენციაზე სიტყვით გამოსვლისას გააკეთა, დაემთხვა ევროკავშირის მიერ ამერიკის შეერთებულ შტატებთან სავაჭრო შეთანხმების მოლაპარაკებებს, თუმცა მას კონკრეტულად არ უხსენებია შეერთებული შტატები ან პრეზიდენტი დონალდ ტრამპი.
„საერთაშორისო ვაჭრობას უნდა დავუბრუნოთ თავისუფლება და სამართლიანობა, ბევრად მეტად ვიდრე ბარიერები და ტარიფები, რომლებიც უძლიერესების მიერ არის მოგონილი და ხშირად გამოიყენება შანტაჟის ინსტრუმენტად და არა დაბალანსების ინსტრუმენტად“, – აღნიშნა ემანუელ მაკრონმა.
„სავაჭრო ომის და ტარიფების დაბრუნება პლანეტის ამჟამინდელ ეტაპზე არის აბსურდი, მით უმეტეს, როდესაც ვხედავ ტარიფებს, რომლებიც წესდება იმ ქვეყნებზე, რომლებიც ახლა იწყებენ ეკონომიკურ აღმასვლას“, – დასძინა მან.