“ცდილობენ საზოგადოება მოატყუონ რომ ლელო და გახარიები არ წარმოადგენენ ნაცმოძრაობას, თვალში ნაცრის შეყრაა”

„ლელო“ ყოველთვის უფრო იხრებოდა არჩევნებში მონაწილეობისკენ. მართალია, ამას დღემდე მკაფიოდ არ ამბობდნენ, თუმცა ჩანდა მათი პარტიული აქტიურობა რეგიონებში, – ამის შესახებ „ქართული ოცნების“ წევრმა, დავით მათიკაშვილმა განაცხადა.

მისი თქმით, „ლელო“ დღეს უკვე არჩევნებში მონაწილეობაზე ღიად აცხადებს გიორგი გახარიას პარტიის მსგავსად.

„დღეს ყველაფერს ღიად აცხადებენ გახარიებთან ერთად და კიდევ „გირჩი“ იღებს მონაწილეობას, რამდენადაც ჩვენთვის არის ცნობილი, თვითმმართველობის არჩევნებში.  აქ არის ერთი მარტივი მოცემულობა, ის გეგმა რომელიც 2024 წლისთვის არსებობდა და იყო მცდელობა, გაემიჯნათ ერთმანეთისგან „ნაციონალური მოძრაობა“ და „ნაციონალური მოძრაობისგან“ წარმოქმნილი სხვა მემკვიდრე და თანაზიარი პარტიები, იმავე გეგმით მუშაობა გრძელდება. ისევ ცდილობენ, საზოგადოება მოატყუონ და უთხრან, რომ ეს პარტიები, „ლელო“, გახარიები, არ წარმოადგენენ „ნაციონალურ მოძრაობას“ და მოიპოვონ იმ ადამიანების ნდობა, რომლებიც ხელისფლების მხარდამჭერები არიან. საზოგადოებისთვის თვალში ნაცრის შეყრაა, იმდენად დიდი ტყუილია, რომ როგორც არ იმუშავა 2024 წელს, ისე არ იმუშავებს დღეს“, – განაცხადა დავით მათიკაშვილმა.

მისი თქმით, იყო მცდელობა სალომე ზურაბიშვილის გარშემო მიზიდულობის ცენტრი შექმნილიყო.

„კარგად გახსოვთ, იყო მცდელობა სალომე ზურაბიშვილის გარშემო მიზიდულობის ცენტრი შექმნილიყო, თოთქოს ეს ქალი არ იყო „ნაციონალური მოძრაობის“ წიაღში. კარგად ვიცით ის მესიჯბოქსები, განცხადებები, გადადგმული ნაბიჯები, რაც ამ ქალბატონს ჰქონდა 2024 წლისთვის და აბსოლუტურად საპირისპიროს მიუთითებდა. დღესაც იგივე ხდება, ერთ მხარეს ე.წ. ორთოდოქს „ნაციონალებს“ აუკრძალეს არჩევნებში მონაწილეობა, ხოლო ნაწილს მისცეს მწვანე შუქი. უნდათ, პოლიტიკური ველიდან გააქრონ ის პარტია, რომელიც არის დამძიმებული ცოდვებით, რომელთა ჩამორეცხვა პრაქტიკულად შეუძლებელია. ქვეყნის ფარგლებს გარეთ ფიქრიბენ, რომ, მაგალითად, გახარია და ხაზარაძე, ეს ადამიანები, რომლებიც „ნაციონალური მოძრაობის“ წიაღში იყვნენ და დღესაც არიან, ეს ადამიანები გამიჯნონ „ნაცმოძრაობისგან“ და მათგან შექმნან შუაშისტური ძალა, რაც არის შეუძლებელი. ამ ყველაფერს თვითმმართველობის არჩევნებზე ქართველი ხალხი დაადასტურებს საკუთარი გადაწყვეტილებით“, – განაცხადა დავით მათიკაშვილმა.