თებერვალში უკრაინის პრეზიდენტმა, ვოლოდიმირ ზელენსკიმ განაცხადა, რომ 2022 წლის თებერვლიდან მოყოლებული 46 000-ზე მეტი უკრაინელი სამხედრო დაიღუპა, ხოლო 380 000 – დაჭრილია, მან ასევე ახსენა ათობით ათასი უგზო-უკვლოდ დაკარგული ან რუსების მიერ ტყვედ აყვანილი – დაღუპულთა რიცხვი, სავარაუდოდ, გაცილებით მაღალია, – წერს ფრანგული გამოცემა Le Monde-ი სტატიაში სათაურით „უკრაინაში ახალი სამხედრო სასაფლაოების გახსნა იგეგმება“.
სტატიაში აღნიშნულია, რომ უკრაინაში სასაფლაოების მშენებლობა, გარკვეულწილად, ომის კონტურების რეალურ დროში თვალყურის დევნებაცაა, მათ შორის ყველაზე ცუდი სცენარის გათვალისწინებით.
„[სასაფლაოებზე] სამხედროებისთვის გამოყოფილი ადგილები სავსეა. ყველგან არქიტექტორთა გუნდები მუშაობენ მემორიალებზე, რომლებიც მოგვითხრობენ როგორც დაღუპულთა დიდი რაოდენობის, ისე ერის იდეის შესახებ მიმდინარე მსჯელობის ამსახველ ისტორიებს“, – ნათქვამია სტატიაში.
„კიევი-ოდესის დამაკავშირებელ ავტომაგისტრალზე, ფიჭვნარში კარგად დამალული ქვიშიანი გზაა. ბულდოზერების მიერ ახლად გათხრილი, ჯერ კიდევ აღუნიშნავი ეს გზა უზარმაზარ სამშენებლო მოედანს მოასწავებს. ეს არის ავტომაგისტრალის გასასვლელი, რომელიც უკრაინის მომავალ სამხედრო მემორიალს მოემსახურება. გიგანტური, უაღრესად მგრძნობიარე პროექტია“, – წერს სტატიის ავტორი.
სტატიის ავტორი კითხვას სვამს – „იქნებ ეს სამშენებლო მოედნები, რომლებიც უკრაინაში ჩნდება, სტატისტიკაზე უკეთ მოგვითხრობს მიმდინარე ხოცვა-ჟლეტის შესახებ?“.
„რუსეთის შემოჭრის დაწყებიდან ბრძოლაში დაღუპული ჯარისკაცების რაოდენობა საიდუმლოდ რჩება. მიმდინარე წლის თებერვალში, უკრაინის პრეზიდენტმა, ვოლოდიმირ ზელენსკიმ 2022 წლის თებერვლიდან 46 000-ზე მეტი დაღუპული და 380 000 დაჭრილი უკრაინელი სამხედრო ახსენა, ასევე „ათობით ათასი“ „უგზო-უკვლოდ დაკარგული“ ან რუსების მიერ ტყვედ აყვანილი. დაღუპულთა რიცხვი, სავარაუდოდ, გაცილებით მაღალია“, – ხაზგასმით აღნიშნულია სტატიაში.
ჰატნეს მომავალი სამხედრო სასაფლაოს თითოეულ სექტორზე საფლავების რიგები კოლუმბარიუმის გარშემო განთავსდება, რაც მიზნად ისახავს მოთხოვნის სტიმულირებას – უკრაინელები კვლავ თავს იკავებენ კრემაციისგან. თეთრი მუხის დროებით სამარხებში კი „პირველ გმირებს“, ასევე უცნობი ჯარისკაცების ნეშტებს დაკრძალავენ.