თეთრი სახლის გადაწყვეტილებით, ამერიკული გამოცემა „უოლ სთრით ჯორნალი“ აშშ-ის პრეზიდენტს შოტლანდიაში ვიზიტის დროს აღარ გაჰყვება.
ამის შესახებ „ბლუმბერგი“ წერს.
გადაწყვეტილება მიღებულა მას შემდეგ, რაც მედიასაშუალებაში გამოქვეყნდა სტატია, სადაც ნათქვამია, რომ 2003 წელს დონალდ ტრამპმა ჯეფრი ეპშტეინს 50 წლის იუბილეზე უხამსი შინაარსის მისალოცი წერილი გაუგზავნა, რაზეც აშშ-ის პრეზიდენტი აცხადებს, რომ წერილი ყალბია.
„სააპელაციო სასამართლომ დაადასტურა, რომ „უოლ სთრით ჯორნალს“ ან ნებისმიერ სხვა საინფორმაციო სააგენტოს, არ აქვს გარანტირებული სპეციალური წვდომა პრეზიდენტ ტრამპის საქმიანობის გასაშუქებლად ოვალურ კაბინეტში, Air Force One-ის ბორტზე და მის კერძო სამუშაო ადგილებში“, – განაცხადა თეთრი სახლის პრესმდივანმა, კეროლაინ ლევიტმა.
კეროლაინ ლევიტს არ დაუკონკრეტებია, შეზღუდვა დროებითია თუ არა.