ათასობით ადამიანი შეიკრიბა კიევის ქუჩებში სამშაბათს საღამოს, რათა გააპროტესტებინათ პრეზიდენტ ვოლოდიმირ ზელენსკის მთავრობის ნაბიჯები ანტიკორუფციული ინსტიტუტების შესასუსტებლად – ეს იყო ქვეყნის პირველი მასშტაბური ანტისამთავრობო დემონსტრაცია ომის სამწელიწად-ნახევრის განმავლობაში, – წერს ამერიკული გაზეთი The New York Times-ი.
პროტესტი პრეზიდენტის ოფისთან კიევის ცენტრში, რომელშიც მონაწილეობდნენ როგორც სამოქალაქო პირები, ასევე ჯარისკაცები, ეროვნულ ერთიანობაში ამ დრომდე ყველაზე მნიშვნელოვანი ბზარია.
„ჩემი მეუღლე სანგრებშია და ისინი ამისთვის არ იბრძვიან“, – განაცხადა 31 წლის კატერინა ამელინამ.
დემონსტრაცია გაიმართა რამდენიმე საათში მას შემდეგ, რაც უკრაინის პარლამენტმა, რომელსაც ზელენსკის პარტია აკონტროლებს, მიიღო ზომა, რომელიც ორ ანტიკორუფციულ სააგენტოს დამოუკიდებლობას ართმევს.
კანონი უკრაინის გენერალურ პროკურორს, რომელსაც პრეზიდენტი ნიშნავს, ახალ უფლებამოსილებებს ანიჭებს ანტიკორუფციულ სააგენტოებზე.
„ეს ძალიან სევდიანი მომენტია, რადგან ჩემთვის ეს ნიშნავს, რომ დროში უკან ვბრუნდებით, როდესაც ჩვენ იგივე დისკუსია გვქონდა“, – განაცხადა მუსტაფა ნაიემმა, პარლამენტის ყოფილმა წევრმა.
აქტივისტები და ანალიტიკოსები აღნიშნულ კანონმდებლობას განიხილავენ, როგორც დამოუკიდებელ მედიაზე, მთავრობის კრიტიკოსებსა და სამთავრობო ზედამხედველობის ჯგუფებზე ფართომასშტაბური ზეწოლის ნაწილს, რაც საფრთხეს უქმნის რთულად მოპოვებულ დემოკრატიულ პროგრესს.