ტაილანდმა და კამბოჯამ სადავო საზღვრისპირა რეგიონში ერთმანეთს ცეცხლი გაუხსნეს. ინფორმაციას CNN-ი ავრცელებს.
ამერიკული ტელეარხის ცნობით, ქვეყნებს შორის ურთიერთობა მაისში გამწვავდა, როცა სადავო საზღვრისპირა რაიონში, რომელიც ზურმუხტის სამკუთხედით არის ცნობილი, სადაც ერთმანეთს ერთდროულად ტაილანდი, კამბოჯა და ლაოსი ესაზღვრება, კამბოჯელი ჯარისკაცი მოკლეს.
კამბოჯისა და ტაილანდის შეიარაღებულმა ძალებმა განაცხადეს, რომ ისინი თავდაცვის რეჟიმში მოქმედებდნენ და სროლაში ერთმანეთი დაადანაშაულეს. ინციდენტი მოგვარდა, თუმცა მოგვიანებით კამბოჯამ საზღვრის აღნიშნულ მონაკვეთზე ნაღმების განთავსება დაიწყო.
ნაღმზე რამდენიმე ტაილანდელი სამხედრო აფეთქდა. ჯარისკაცებმა დაკარგეს ქვედა კიდურები. აღნიშნულმა ფაქტმა ტაილანდი გააღიზიანა, რომელმაც საპასუხოდ კამბოჯასთან დიპლომატიური ურთიერთობების დონე დაწია და გამშვები პუნქტები ჩაკეტა.
გუშინ საღამოს საზღვარზე ვითარება კვლავ გამწვავდა. მხარეები ერთმანეთს სამხედრო ავიაციის, არტილერიის გამოყენებით უტევენ. ვრცელდება ცნობები დაჭრილებისა და დაღუპულების შესახებ. დაღუპულებს შორის არიან მშვიდობიანი მოქალაქეებიც.