საჰაერო განგაშისა და კომენდანტის საათის ამოქმედების მიუხედავად, დემონსტრანტების ნაწილმა პოლიციას თავშესაფარში გადასვლაზე და ბანკოვის ქუჩის დატოვებაზე უარი უთხრა. პრეზიდენტის ოფისის მიმდებარედ ნიღბიანებმა ვოლოდიმირ ზელენსკის და მისი ადმინისტრაციის ხელმძღვანელის ანდრეი ერმაკის გამოსახულებიან პლაკატებს ცეცხლი მოუკიდეს.
შეკრების ადგილი უცვლელია, კიევის ცენტრში, ათასობით მოქალაქე ვოლოდიმირ ზელენსკის მიერ ანტიკორუფციული ინსტიტუტების დამოუკიდებლობის გაუქმებას მეოთხე დღეა აპროტესტებს. დედაქალაქთან ერთად, მასობრივი აქციები იმართება რივნეში, ლვივში, ტერნოპილში, დნიპროში, ზაპოროჟიეში, ვინიცაში და ჟიტომირში. ქვეყნის 17 ქალაქში დემონსტრაციები არ წყდება.
პროტესტის საპასუხოდ, უკრაინის პრეზიდენტმა რადაში ანტიკორუფციული ორგანოების უფლებამოსილებების შესახებ ახალი კანონპროექტი წარადგინა. ზელენსკიმ განმარტა, რომ შეთავაზებული პაკეტი ინსტიტუტების დამოუკიდებლობის სრულფასოვან გარანტიებს შექმნის.
სადავო კანონის ხელმოწერის გარემოებებს ასახელებს “უკრაინსკაია პრავდა”. გამოცემის ინფორმაციით, ანტიკორუფციულმა უწყებებმა ზელენსკის ახლო გარემოცვის წევრების მოკვლევა დაიწყეს. სავარაუდოდ, ბრალს ამზადებენ სტუდია “კვარტალ 95-ის” მფლობელისთვის. ჩხრეკა ჩატარდა პრეზიდენტის ოფისის ხელმძღვანელის ყოფილი მოადგილის სახლშიც. საგამოძიებო მოქმედებებიდან ერთ კვირაში, პრეზიდენტმა უწყებები არაეფექტურობაში საჯაროდ დაადანაშაულა და მათ შემზღუდავ კანონს ხელი მოაწერა.