ომის 1246-ე დღეს, უკრაინაში ისევ აფეთქებების ხმა ისმის. მოსახლეობა რუსულ უპილოტო საფრენ აპარატებს და რაკეტებს ბომბ-თავშესაფრებში ემალება, თუმცა აფეთქებით გამოწვეული შემზარავი ხმა აქაც აღწევს.
კრემლის მთავარი სამიზნე კვლავ უკრაინული ქალაქები და მშვიდობიანი მოსახლეობაა. 235 უპილოტო საფრენი აპარატით და 27 რაკეტით, დნიპროსა და ხარკოვზე მიტანილ იერიშებს 3 ადამიანის სიცოცხლე ემსხვერპლა.
შეიარაღებული დაპირისპირების ფონზე, ფრონტის ხაზზე არსებულ ვითარებას აფასებს ომში მყოფი ქვეყნის პრეზიდენტი. ვოლოდიმირ ზელენსკი მეომრებს მადლობას უხდის, აქცენტს სამხედრო აღჭურვილობის რაოდენობის გაზრდის აუცილებლობაზე აკეთებს და რუსეთზე საერთაშორისო ზეწოლის გაძლიერებას ითხოვს.
ვიდრე უკრაინის პრეზიდენტი ომზე საუბრობს, მშვიდობის დასამყარებლად, შეხვედრის მასპინძლობისთვის ემზადება რეჯეფ ტაიპ ერდოღანი. თურქეთის პრეზიდენტის ინიციატივაზე განცხადებას აკეთებს ოფიციალური ანკარაც, ნათქვამია, რომ მოლაპარაკებასთან დაკავშირებით, პროგრესი უკვე მიღწეულია.
რუსეთისა და უკრაინის ლიდერების შეხვედრას მიესალმება ამერიკის შეერთებული შტატების პრეზიდენტი, თუმცა ამბობს იმასაც, რომ ეს ბევრად ადრე უნდა მომხდარიყო. დონალდ ტრამპი რუსეთისთვის ახალი სანქციების დაწესებასაც არ გამორიცხავს.
სანამ ახალ სანქციებს ვაშინგტონი დააწესებს, ბრიუსელი იმ სახელმწიფოებს ამოწმებს, რომლებსაც შესაძლოა ევროკავშირის მიერ რუსეთისთვის დაწესებული შეზღუდვებისთვის გვერდი აევლოთ. პოლონური მედია იუწყება, რომ რუსეთის წინააღმდეგ სანქციების დირექტივის შეუსრულებლობის გამო ევროკომისიამ პოლონეთისა და კიდევ 18 ქვეყნის წინააღმდეგ გამოძიება უკვე დაიწყო. მედიის ცნობით, დაწესებულ სანქციებს არღვევს ბელგია, ბულგარეთი, ჩეხეთი, გერმანია, ესპანეთი, საფრანგეთი, იტალია, უნგრეთი, ავსტრია და კიდევ 10 ქვეყანა.
ბრიუსელის გამოძიებაზე არ საუბრობს, თუმცა უკრაინაში ომის დასრულების აუცილებლობაზე ვრცელი კომენტარი გააკეთა ვიქტორ ორბანმა. უნგრეთის პრემიერი ამბობს, რომ საომარო მოქმედებების შედეგად, უკრაინა რუსეთთან მდებარე უფერულ ზონად იქცა.
უკრაინას მისამართის შეცვლა არ შეუძლია, არ იცვლება არც საომარი ვითარება, რომელიც ქვეყანაში უკვე 3 წელია მძვინვარებს. 2022 წლიდან დღემდე, კიევსა და მოსკოვს შორის შემდგარი არაერთი მოლაპარაკების მიუხედავად, მხარეებმა ხანგრძლივი მშვიდობის შესახებ შეთანხმების მიღწევას ისევ ვერ ახერხებენ.