აშშ-ის პრეზიდენტი დონალდ ტრამპი აცხადებს, რომ ისრაელმა უნდა მიიღოს გადაწყვეტილება შემდეგი ნაბიჯების შესახებ ღაზასთან დაკავშირებით.
„ჩვენ დავაბრუნეთ ბევრი მძევალი. ახლა გვყავს გარდაცვლილი მძევლები და დედები მათ დაბრუნებას ითხოვენ. დაახლოებით 20 ცოცხალი ადამიანია, მაგრამ ბევრი ცხედარია“, – განაცხადა დონალდ ტრამპმა.
ტრამპმა განმარტა, რომ როდესაც მძევლების რაოდენობა გარკვეულ რიცხვამდე შემცირდება, „ჰამასთან“ შეთანხმების დადება შეუძლებელი გახდება.
„როცა რიცხვი გარკვეულ ოდენობამდე შემცირდება, „ჰამასთან“ გარიგების მიღწევა შეუძლებელი გახდება, რადგან როგორც კი ისინი მათ გათავისუფლებენ, ეგონებათ, რომ ეს მათი დასასრული იქნება. რამდენიმე დღის წინ ჩვეულებრივი მოლაპარაკებები ჰქონდათ და უცებ გაამკაცრეს პოზიცია. არ სურთ, მძევლები დააბრუნონ, ამიტომ ისრაელმა გადაწყვეტილება უნდა მიიღოს“, – აღნიშნავს ტრამპი.
დონალდ ტრამპის თქმით, აშშ-მა 60 მილიონი დოლარი გამოყო ღაზის სექტორისთვის ორი კვირის წინ, მაგრამ „არავინ აღიარა ეს და არც მადლობა გადაიხადა“.
დონალდ ტრამპის თქმით, აშშ უფრო მეტ დახმარებას გაუწევს ღაზას, მაგრამ სურს, სხვა ქვეყნებმაც მიიღონ ამაში მონაწილეობა, რადგან ეს „საერთაშორისო პრობლემაა“.
ამასთან, ამერიკის პრეზიდენტმა განაცხადა, რომ ისრაელის პრემიერ-მინისტრს, ბენიამინ ნეთანიაჰუს ირანთან დაკავშირებით ესაუბრა.