რუსულ ავიაკომპანია „აეროფლოტზე“ თავდასხმაზე პასუხისმგებლობა ჰაკერულმა დაჯგუფებებმა, Silent Crow-მ და „კიბერპარტიზანებმა“ აიღეს.
ჰაკერების განცხადებით, კიბერთავდასხმის შედეგად განადგურებულია „აეროფლოტის“ 7 000 სერვერი და მათ ხელში აღმოჩნდა 20 ტერაბაიტის მოცულობის მონაცემები. მათივე ინფორმაციით, კომპრომიტირებულია „აეროფლოტის“ ყველა სასიცოცხლოდ მნიშვნელოვანი კორპორატიული სისტემა, მათ შორის ინფორმაცია ფრენების ისტორიის შესახებ.
მათივე მტკიცებით, მიიღეს წვდომა კომპანიის თანამშრომლების, მათ შორის ტოპ მენეჯერების კომპიუტერებთან, ასევე მოლაპარაკებების აუდიოჩანაწერებთან, თვალთვალის სისტემებსა და შიდა მიმოწერასთან. ჰაკერებმა განაცხადეს, რომ შესაბამისი მონაცემების გასაჯაროებას აპირებენ.
ცნობისთვის, მანამდე „აეროფლოტში“ განაცხადეს, რომ საინფორმაციო სისტემაში არსებული ხარვეზის გამო 40-ზე მეტი ფრენა გაუქმდა. მათ შორის რეისები სანკტ-პეტერბურგში, ყაზანში, ერევანში, მინსკში და ა.შ.
რუსული მედია იუწყება, რომ მომხდარის გამო მოსკოვის შერემეტევოს აეროპორტში კოლაფსია. „აეროფლოტმა“ მოუწოდა მგზავრებს, აიღონ ბარგი და დატოვონ აეროპორტი.