ერთი დღე გავიდა მას შემდეგ, რაც ურსულა ფონ დერ ლაიენმა დონალდ ტრამპთან სავაჭრო შეთანხმებას მოაწერა ხელი, და ეს სულ უფრო ჰგავს არა იმას, რომ მან სავაჭრო ომი თავიდან აიცილა, არამედ კაპიტულაცია გამოაცხადა. სტატიას ამ შინაარსით Euractiv-ი ავრცელებს.
გამოცემის ცნობით, მიუხედავად იმისა, რომ ახალი შეთანხმებით, ტრამპის მიერ მომავალ თვეს დაანონსებული 30-პროცენტიანი ტარიფები ძალაში აღარ შევა, გრძელვადიან პერსპექტივაში, ამერიკა ევროკავშირს 15-პროცენტიან გადასახადებს უწესებს ავტომობილებით დაწყებული ღვინით დასრულებული.
როგორც Euractiv-ი წერს, ჯერჯერობით უცნობია, შეძლებს თუ არა ევროკავშირი ყველა იმ ვალდებულების შესრულებას, რომელიც ახალ შეთანხმებაშია ჩაწერილი.
ენერგეტიკა
აშშ-თან დადებული შეთანხმების თანახმად, ევროკავშირი ამერიკულ თხევად ბუნებრივ აირს, ნავთობსა და ბირთვულ საწვავს დიდი მოცულობებით იყიდის, განაცხადა ევროკომისიის პრეზიდენტმა.
გამოცემის ცნობით, მრავალმა ანალიტიკოსმა უკვე დასცინა შეთანხმებას, რადგან ევროკავშირმა ამერიკისგან წელიწადში 250 მილიარდი დოლარის ღირებულების საწვავი უნდა იყიდოს. დღესდღეობით ბრიუსელი ვაშინგტონისგან 64 მილიარდი დოლარის ოდენობის ნავთობსა და სხვა სახის საწვავს ყიდულობს.
ჯანდაცვა
როგორც Euractiv-ი წერს, ფონ დერ ლაიენმა გაურკვევლობა შემოიტანა, როცა გასულ პარასკევს განაცხადა, რომ ფარმაცევტულ პროდუქციაზე ამერიკა 15-პროცენტიან ტარიფებს აწესებს.
ევროკომისიის განცხადებით, ტარიფების ზომა 15% არ გასცდება, თუმცა თავად ტრამპს ამის გარანტია არ გაუცია. გარდა ამისა, ევროკავშირი იღებს ვალდებულებას აშშ-ის ეკონომიკაში 600 მილიარდი დოლარის ოდენობის ინვესტიცია განახორციელოს.
სოფლის მეურნეობა და სურსათი
ახალი ხელშეკრულების თანახმად, ბრიუსელი ტარიფებს აუქმებს ისეთ ამერიკულ პროდუქციაზე, როგორიცაა სოიო და კაკალი. Euractiv-ის ინფორმაციით, შეთანხმება საინტერესოა ლობსტერების შესახებ სპეციალური პუნქტის წყალობითაც.
როგორც ჩანს, აშშ გააგრძელებს ევროპაში ლობსტერების გადასახადების გარეშე გაყიდვას იმ დროს, როცა ევროპული სურსათი აშშ-ში 15%-ით დაიბეგრება.
ერთ-ერთმა ევროპელმა ჩინოვნიკმა დაადასტურა, რომ მოლაპარაკებები ალკოჰოლური პროდუქციის შესახებ ჯერ კიდევ გრძელდება. ბრიუსელი სოფლის მეურნეობის პროდუქციასთან დაკავშირებით „ძლიერ პოზიციას ავლენს“.
თავდაცვა
როგორც ტრამპმა აღნიშნა, სამხედრო დანიშნულების ტვირთებით ვაჭრობა აშშ-სა და ევროკავშირს შორის დაუბეგრავი დარჩება.
თუმცა, როგორც Euractiv-ი აღნიშნავს, ჯერ უცნობია, გათავისუფლდებიან თუ არა ტარიფებისგან ფოლადისა და ნახევარგამტარი ჩიპები, თუ მათ სამხედრო მრეწველობაში გამოიყენებენ.
მიუხედავად იმისა, რომ გასულ პარასკევს ტრამპმა თქვა, რომ ევროპელები დიდი ოდენობით ამერიკულ იარაღს შეიძენენ, იარაღის შეძენა ახალი შეთანხმების ნაწილს არ წარმოადგენს.
ტექნოლოგიები
ევროკომისიის აღიარების მიუხედავად იმის შესახებ, რომ ევროკავშირი ვერ შეძლებს მიაღწიოს მიზანს, რომლის თანახმადაც მან 2030 წლისთვის მსოფლიოში ნახევარგამტარების მეხუთედი უნდა აწარმოოს, ფონ დერ ლაიენმა ტრამპს ჩიპების ბაზარზე გამარჯვება მოაპოვებინა, წერს გამოცემა.
ახალი ხელშეკრულების თანახმად, ევროკავშირში წარმოებული ნახევარგამტარები 15-პროცენტიანი ტარიფით დაიბეგრება, თუმცა ევროპულ მიკროსქემებზე გადასახადები არ დაწესდება.