გერმანული მედიის ცნობით, არაბული ქვეყნები „ჰამასს“ ღაზის სექტორის მთავრობის დატოვებისკენ მოუწოდებენ. როგორც გერმანული სააგენტოები იუწყებიან, ამ მოწოდებით დაჯგუფება „ჰამასს“ ეგვიპტემ, კატარმა, საუდის არაბეთმა და იორდანიამ მიმართეს.
მედიის ცნობით, დოკუმენტს, რომელიც მათ მოიპოვეს, ხელს ასევე აწერენ დიდი ბრიტანეთი, საფრანგეთი, კანადა, ბრაზილია, იტალია, ესპანეთი, ნორვეგია და ირლანდია.
განცხადებაში, რომელიც ახლო აღმოსავლეთში კონფლიქტის დასრულებისკენ მოწოდებას შეიცავს, ნათქვამია, რომ „ჰამასმა“ უნდა შეწყვიტოს მმართველობა ღაზის სექტორში და გადასცეს იარაღი პალესტინის ავტონომიას, რაც საერთაშორისო მხარდაჭერით უნდა განხორციელდეს. ამას გარდა, დოკუმენტის ხელმომწერები გმობენ 2023 წლის 7 ოქტომბერს „ჰამასის“ მიერ ისრაელზე მოწყობილ ტერორისტულ თავდასხმას.
დოკუმენტის ხელმომწერები მოუწოდებენ ისრაელს, დაუყოვნებლივ შეწყვიტოს საომარი მოქმედებების ღაზის სექტორში. ისინი მხარს უჭერენ რეგიონში გაერო-ს სტაბილიზაციის ძალების შექმნას. მათივე თქმით, პალესტინის სახელმწიფოს შექმნა ასევე არის „ორი სახელმწიფოს გადაწყვეტის არსებითი და განუყოფელი შემადგენელი ნაწილი“. სააგენტოების ცნობით, აღნიშნულ დოკუმენტი სექტემბერში გაერო-მ უნდა მიიღოს.