ბანკის მფლობელი გახლავთ ფონდი „ქართუ“ და ნებისმიერი თანხა, ნებისმიერი ამონაგები ნებისმიერი ბიზნესიდან, რომელსაც ჯგუფი „ქართუ“ ფლობს, იხარჯება მხოლოდ და მხოლოდ ქველმოქმედებაში. ბატონი უტა გახლავთ ჯგუფ „ქართუს“ ერთ-ერთი თანადამფუძნებელი და ხელმძღვანელი და ის იღებს გადაწყვეტილებას მხოლოდ და მხოლოდ იმ საკითხზე, თუ რომელი ქველმოქმედების მიმართულებით დაიხარჯოს თანხა, – ასე გამოეხმაურა კულტურის კომიტეტის თავმჯდომარე გიორგი გაბუნია ბანკ „ქართუს“ გადაწყვეტილებას, რომელიც „ტვ პირველს“ ცილისწამებისთვის უჩივის.
ის ბანკის მისამართით გაჟღერებულ ბრალდებებს თითიდან გამოწოვილს უწოდებს და აცხადებს, რომ ამის მიზანი ფონდის რეპუტაციის შელახვაა.
„ფონდი „ქართუ“ უმნიშვნელოვანეს საქმეს აკეთებდა ათწლეულების განმავლობაში ქართული განათლებისთვის, ქართული კულტურისთვის, ქართული სპორტისთვის და უმნიშვნელოვანესი, საუკუნის პროექტები განხორციელდა – კულტურული მემკვიდრეობის ასობით ძეგლი აღდგა, საქართველოში არ არსებობს არცერთი თეატრი, ხელოვნების ან სპორტის დაწესებულება, რომელსაც არ დაეხმარა და მხარი არ დაუჭირა ფონდმა „ქართუმ“. ეს არ ასვენებთ, ეს აღიზიანებთ მათ და ყველანაირად ცდილობენ, ფონდ „ქართუს“ რეპუტაცია და იმიჯი შელახონ ქართულ საზოგადოებაში და მცდარი წარმოდგენები ჩამოაყალიბონ“, – აცხადებს გაბუნია.
ბანკი „ქართუ“ „ტვ პირველს“ ცილისწამებისთვის სასამართლოში უჩივის.