ქართულ დემოკრატიაზე თავდასხმა რამდენიმე ფრონტზეა გაშლილი, ევროპარლამენტის რეზოლუცია, რომელიც არჩევნებზე ტყუილს ავრცელებს და ევროკავშირის ელჩი, რომელიც ამას არ ემიჯნება, – ამის შესახებ პარლამენტის თავმჯდომარემ, შალვა პაპუაშვილმა განაცხადა.
მისივე თქმით, ვინც სიძულვილის ენას, დეზინფორმაციას ავრცელებს და დემოკრატიას არ აღიარებს, ყველა დაფინანსებულია ევროკავშირის ბიუჯეტიდან.
„ეს ის დეზინფორმაციაა, რომელიც ბრიუსელის მხრიდან საქართველოს წინააღმდეგ ვრცელდება. ევროპარლამენტში ეს რეზოლუცია მიღებული იყო გაფართოების კომისრის, მარტა კოსის თანდასწრებით, მისი შექების და ტაშის თანხლებით. როცა ბრიუსელის ოფიციალურ დოკუმენტებში ასეთი დეზინფორმაცია იწერება, ეს იქნება არჩევნებთან დაკავშირებით, ასევე, შეგახსენებთ, რომ ამ რეზოლუციაში მიხეილ სააკაშვილის გათავისუფლებაზეც არის მოთხოვნა, ეს ევროკავშირის ინსტიტუტების მიმართ ნდობას კიდევ ერთხელ ჩრდილს აყენებს. სამწუხაროდ, ევროკავშირის ელჩი ამ რეზოლუციას არ გამიჯვნია, რითაც ამ ტყუილის გავრცელებას ხელს უწყობს.
ქართულ დემოკრატიაზე თავდასხმა რამდენიმე ფრონტზეა გაშლილი. ერთი მხრივ, ევროპარლამენტის რეზოლუცია არსებობს, რომელიც არჩევნებთან დაკავშირებით ტყუილს ავრცელებს, რომ თითქოს გაყალბდა და მეორე მხრივ, ევროკავშირის ელჩი ამ რეზოლუციას არ ემიჯნება. ამ რეზოლუციის დეზინფორმაციულობას არ ამხელს და არ ამბობს, რომ ეს მის პოზიციას არ წარმოადგენს. ამასთან, ევროკავშირის საელჩოს მიერ დაფინანსებული „ენჯეოები“ არიან, რომლებიც არჩევნებს, დემოკრატიულ ინსტიტუტებს არ აღიარებენ და ევროკავშირის ელჩი მათ დაფინანსებას აგრძელებს. ეს ყველაფერი ქართულ დემოკრატიაზე თავდასხმაა და სამწუხაროდ, ამ თავდასხმის ერთ-ერთი თანამონაწილე ევროკავშირის ელჩია. ჩვენ ბრიუსელის პრესსპიკერის განცხადება მოვისმინეთ დეზინფორმაციაზე და ბოდიში მოიხადოს ყველამ, მათ შორის ბრიუსელში, ვიდრე ქართველებს დეზინფორმაციას დააბრალებს. მილიონი ფაქტი დავასახელეთ, ამ პრესსპიკერის მხრიდან არცერთი ფაქტი გაბათილებული არ იყო. ხელი აგვიქნიეს, რომ დეზინფორმაცია არისო, სად არის პასუხები იმ კითხვებზე, რომელსაც ვსვამთ. რატომ აფინანსებს ევროკავშირი იმ ორგანიზაციებს, რომლებიც არ აღიარებენ დემოკრატიულ ინსტიტუტებს, ქართველი ხალხის არჩევანს და ავრცელებენ დეზინფორმაციას, სიძულვილს? – ვინც სიძულვილის ენას, დეზინფორმაციას ავრცელებს და დემოკრატიას არ აღიარებს, ყველა დაფინანსებულია ევროკავშირის ბიუჯეტიდან. რა თქმა უნდა, ეს პირდაპირ ევროკავშირის ელჩის პასუხისმგებლობაა, რომელიც ამის თანამონაწილეა“, – განაცხადა პაპუაშვილმა.