რუსეთის მიერ უკრაინის დედაქალაქ კიევის დაბომბვის შედეგად დაღუპულთა რიცხვი შვიდამდე გაიზარდა. უკრაინული მედიის თანახმად, დაღუპულთა შორის ერთი ექვსი წლის ბავშვია.
სამძებრო-სამაშველო ოპერაცია გრძელდება. დანგრეული სახლის ნანგრევებიდან ცოცხალი მამაკაცი ამოიყვანეს.
უკრაინის პრეზიდენტის, ვოლოდიმირ ზელენსკის განცხადებით, რუსეთმა უკრაინას ღამით 300-ზე მეტი უპილოტო აპარატით და რვა რაკეტით შეუტია. ზელენსკის თქმით, თავდასხმების შედეგად დაზარალდა დნეპრის, პოლტავის, სუმის, ნიკოლაევისა და კიევის რეგიონები.
უკრაინის პრეზიდენტმა აღნიშნა, რომ დღეს მსოფლიომ კიდევ ერთხელ იხილა რუსეთის პასუხი ამერიკასა და ევროპასთან ერთად მშვიდობის დამყარების სურვილზე.
„ახალი საჩვენებელი მკვლელობები. ამიტომ ძალის გარეშე მშვიდობა შეუძლებელია. მოსკოვის მშვიდობისკენ იძულება, მათი ნამდვილ მოლაპარაკების მაგიდასთან დაჯდომა – პარტნიორებს ამისთვის ყველა ინსტრუმენტი აქვთ. ჩვენ ველით, რომ ყველაფერი, რასაც ახლა აშშ და ევროპა ამ მიზნით ახმოვანებენ, განხორციელდება“, – განაცხადა ვოლოდიმირ ზელენსკიმ.