რუსეთის თავდაცვის სამინისტრო უკრაინის დონეცკის რეგიონში ქალაქ ჩასოვ იარის დაკავების შესახებ ინფორმაციას ავრცელებს.
გავრცელებული ცნობით, ჩასოვ იარში მიმდინარე ბრძოლების დროს რუსეთის ჯარებმა, როგორც რუსული მედია წერს, სპეციალური სამხედრო ოპერაციის ისტორიაში უკრაინის შეიარაღებული ძალების უდიდესი დაჯგუფება გაანადგურეს.
რუსეთის თავდაცვის სამინისტროს ინფორმაციით, ქალაქისთვის ბრძოლები ერთ წელზე მეტხანს გრძელდებოდა და ლანდშაფტის სირთულისა და შენობებისა და ინფრასტრუქტურის თავისებურებების გამო ის დონბასში უკრაინის შეიარაღებული ძალების ერთ-ერთი ყველაზე ძლიერი გამაგრებული ტერიტორია იყო.
რუსეთის თავდაცვის სამინისტროს განცხადების თანახმად, უკრაინის შეიარაღებული ძალების არტილერიისა და დრონების უწყვეტი ცეცხლის ქვეშ რუსმა მედესანტეებმა 20 კილომეტრზე მეტი გაიარეს. დონეცკის საოკუპაციო რეჟიმის წარმომადგენლების მტკიცებით, უკრაინის შეიარაღებულმა ძალებმა ჩასოვ იარში რამდენიმე ათასი ჯარისკაცი დაკარგეს.