ევროპის, აზიისა და ახლო აღმოსავლეთის გზაჯვარედინზე მდებარე საქართველო, ისტორიულად წარმოადგენდა ბუნებრივ კარიბჭეს აღმოსავლეთსა და დასავლეთს შორის, დღეს ჩვენ ვთავაზობთ ზღვაზე გასასვლელის არმქონე 8 ქვეყანას გლობალურ სავაჭრო მარშრუტებზე წვდომას, რაც მათ დაკავშირებადობას, საიმედოობასა და ახალ შესაძლებლობებს აძლევს, – ამის შესახებ საქართველოს პრემიერ-მინისტრმა ირაკლი კობახიძემ გაეროს კონფერენციაზე სიტყვით გამოსვლისას განაცხადა.
მთავრობის მეთაურმა საქართველოს სტრატეგიულ მდებარეობაზე გაამახვილა ყურადღება და აღნიშნა, რომ ქვეყანა ევროპისა და აზიის გზაჯვარედინზე მნიშვნელოვან სატრანზიტო დერეფანს წარმოადგენს.
„ევროპული ბიზნესისთვის საქართველო ყველაზე მოკლე სახმელეთო მარშრუტს წარმოადგენს არა მხოლოდ სამხრეთ კავკასიისკენ, არამედ ცენტრალური აზიისა და უფრო ფართო აღმოსავლური ბაზრებისკენ და პირიქით – ჩვენი აღმოსავლელი, სახმელეთო მეზობელი ქვეყნებისათვის საქართველო გეოგრაფიულად და ეკონომიკურად ევროპის კარიბჭეა. თუმცა, ეს საკმარისი არ არის – საჭიროა, რომ ეს კარიბჭე ეფექტიანი იყოს. სატრანზიტო ოპერაციების ეფექტიანობა მოითხოვს გააზრებულ პოლიტიკურ არჩევანს, სტრატეგიულ ინვესტიციებსა და მომსახურების მაღალი ხარისხისადმი ერთგულებას. სწორედ ამ გზას ადგას საქართველო უკვე ათწლეულზე მეტია და შედეგებიც ამას ადასტურებს“, – განაცხადა პრემიერმა.
ირაკლი კობახიძემ სიტყვით გამოსვლისას ქვეყანაში არსებულ ხელსაყრელ საინვესტიციო გარემოსა და იმ მასშტაბურ ინფრასტრუქტურულ პროექტებზე ისაუბრა, რომლებიც ქვეყნის დაკავშირებადობის ზრდის ხელშეწყობას ისახავს მიზნად.
„მათ შორისაა აღმოსავლეთ-დასავლეთის ჩქაროსნული მაგისტრალი, ბაქო-თბილისი-ყარსის რკინიგზა, ანაკლიის ღრმაწყლოვანი პორტი და მშრალი პორტები – ყველა ეს პროექტი აძლიერებს საქართველოს სტრატეგიულ როლს აზიასა და ევროპას შორის მდებარე შუა დერეფანში. ეს ინფრასტრუქტურა არა მხოლოდ საქართველოს, არამედ მთელს რეგიონს მოუტანს სარგებელს, რათა გაიხსნას ბაზრები, შემცირდეს სატრანზიტო ხარჯები და ჩვენი ეკონომიკები ინტეგრირდეს გლობალურ სისტემაში.
საქართველოს ხედვა არის ნათელი: არ ვცდილობთ, მხოლოდ ჰაბი გავხდეთ – ჩვენი მიზანია, ვიყოთ მრავალფუნქციური, მრავალმიმართულებიანი ჰაბი – კონტინენტების, ბაზრების, ერებისა და იდეების დამაკავშირებელი“, – აღნიშნა პრემიერ-მინისტრმა.
ირაკლი კობახიძემ კიდევ ერთხელ დაადასტურა საქართველოს მზადყოფნა ეკონომიკური თანამშრომლობის გაღრმავებისთვის, რაც ხელს შეუწყობს რეგიონულ კეთილდღეობას.
