“მათ ქვეყნებში პოლიციელზე ხელის გარტყმისთვის კი არა, სიტყვის თქმისთვისაც კი არის სერიოზული სასჯელები”

პარლამენტის ვიცე-სპიკერი გიორგი ვოლსკი „ბათუმელების“ და „ნეტგაზეთის“ დამფუძნებლის, მზია ამაღლობელის საქმეზე გამოცხადებულ განაჩენს ეხმიანება.

„ხელის გარტყმა ამ შემთხვევაში მხოლოდ კრიმინალურ დანაშაულად არ ითვლება. ეს არის განზრახ ჩადენილი ქმედება, რომელიც სახელმწიფო ინსტიტუტების მორყევის, განუკითხაობის, ძალადობის დაშვების ატმოსფეროს შექმნას ემსახურება. ამას ემსახურება ელჩების გარკვეული ნაწილიც, რომლებიც პრეტენზიებს გამოთქვამენ, თუმცა მათ ქვეყნებში პოლიციელზე ხელის გარტყმისთვის კი არა, სიტყვის თქმისთვისაც კი არის სერიოზული სასჯელები. ამოცანაა, რომ შექმნან დესტაბილიზაცია ქვეყანაში და ხელისუფლებაში მოვიდნენ ის ადამიანები, ვისაც უბრძანებ და ჩაერთვება ომში“, – აღნიშნა ვოლსკიმ.