ისრაელის პრემიერ-მინისტრმა ბენიამინ ნეთანიაჰუმ ღაზის სექტორში ომის დასრულების 5-პუნქტიანი გეგმა წარადგინა. ის ითვალისწინებს: „ჰამასის“ განიარაღებას, ყველა ისრაელელი მძევლის გათავისუფლებას, სექტორის დემილიტარიზაციას და რეგიონში ხელისუფლების „არაისრაელური მშვიდობიანი სამოქალაქო ადმინისტრაციისთვის გადაცემას“. ისრაელი კი, ნეთანიაჰუს გეგმის მიხედვით, ღაზაში უსაფრთხოებაზე იქნება პასუხისმგებელი.
გეგმა ნეთანიაჰუმ იერუსალიმში უცხოური მედიის წარმომადგენლებისთვის გამართულ პრესკონფერენციაზე წარადგინა და თქვა, რომ ქალაქ ღაზის აღება „ომის სწრაფი დასრულების საუკეთესო მეთოდია“. მისივე შეფასებით, ისრაელს არ აქვს სხვა არჩევანი – „საქმე ბოლომდე უნდა მივიყვანოთ და „ჰამასი“ სრულად გავანადგუროთ“.
ამასთან, ნეთანიაჰუმ პირობა დადო, რომ ისრაელი სექტორში „უსაფრთხო კორიდორებს“და დახმარების ახალ პუნქტებს გახსნის.
„ჩვენი მიზანი არ არის ღაზის ოკუპაცია, ჩვენი მიზანია ღაზის გათავისუფლება“, – განაცხადა მან.