ევროკავშირი რუსეთის წინააღმდეგ ახალი სანქციების დაწესებაზე მუშაობს. ამის შესახებ ევროპული დიპლომატიის ხელმძღვანელმა, კაია კალასმა, ევროკავშირის საგარეო საქმეთა მინისტრების შეხვედრის შემდეგ განაცხადა.
მისი თქმით, მინისტრებმა შეხვედრაზე მხარი დაუჭირეს აშშ-ის იმ ნაბიჯებს, რომლებიც სამართლიანი მშვიდობის დამყარებას შეუწყობს ხელს.
კალასმა ასევე აღნიშნა, რომ ევროკავშირი განიხილავს დამატებითი სანქციების დაწესებას რუსეთის წინააღმდეგ.
„ამავდროულად, ჩვენ ვმუშაობთ რუსეთის წინააღმდეგ დამატებითი სანქციების დაწესებაზე, უკრაინის სამხედრო მხარდაჭერის გაზრდაზე და უკრაინის საბიუჯეტო საჭიროებების დაკმაყოფილებასა და ევროკავშირში გაწევრიანების პროცესში მეტი დახმარების გაწევაზე“, – განაცხადა მან.
კალასის განცხადებით, ტრანსატლანტიკური ერთიანობა, უკრაინის მხარდაჭერა და რუსეთზე ზეწოლა არის ის გზა, რომელიც ამ ომს დაასრულებს და მომავალში რუსეთის აგრესიას ევროპაში თავიდან აიცილებს.