მიხეილ ყაველაშვილმა თურქეთის პრეზიდენტს მადლობა გადაუხადა.
”პრეზიდენტ რეჯეფ თაიფ ერდოღანთან პირისპირ და გაფართოებული ფორმატის შეხვედრების დასრულების შემდეგ მედიისთვის ერთობლივი განცხადება გავაკეთეთ. ჩემს კოლეგას გულთბილი მასპინძლობისთვის მადლობა გადავუხადე და საქართველოში პირადად მოვიწვიე.
უმაღლესი დონის შეხვედრებისას, საქართველოსა და თურქეთს შორის არსებული ორმხრივი და მრავალმხრივი ურთიერთობების აქტიური დღის წესრიგი განვიხილეთ, მნიშვნელოვან რეგიონულ საკითხებზე მოსაზრებები გავცვალეთ და სამომავლო თანამშრომლობის პერსპექტივები დავსახეთ. ასევე, ხაზი გავუსვით მაღალი დონის სტრატეგიული პარტნიორობის საბჭოს მორიგი სხდომის გამართვის მნიშვნელობას.
ჩემს კოლეგას საქართველოს სუვერენიტეტისა და ტერიტორიული მთლიანობის, ასევე ევროატლანტიკური ინტეგრაციის პროცესისადმი მხარდაჭერისთვის მადლობა გადავუხადე. ამასთან, დავადასტურე, რომ საქართველოს მთავრობა ერთგულია რუსეთ-საქართველოს კონფლიქტის მშვიდობიანი მოგვარების პოლიტიკის მიმართ.
ვისაუბრეთ სამხრეთ კავკასიის რეგიონში არსებულ ვითარებაზე და ჩვენს ერთობლივ ძალისხმევაზე ამ გამოწვევებთან გამკლავების მიზნით. საქართველო განუხრელად ემხრობა სამხრეთ კავკასიაში მშვიდობიანი თანაცხოვრების ფორმულას და მუდმივად გამოთქვამს მზადყოფნას მშვიდობისა და კონსტრუქციული თანამშრომლობის ხელშეწყობის პროცესში თავისი წვლილი შეიტანოს. მისასალმებელია აზერბაიჯანისა და სომხეთის მიერ განგრძობადი მშვიდობის დამყარებისთვის გადადგმული ნაბიჯები, რომელმაც რეგიონის მშვიდობისა და სტაბილურობისკენ სვლას უნდა შეუწყოს ხელი.
ამასთან, განვიხილეთ, ახლო აღმოსავლეთში მიმდინარე პროცესები. აღინიშნა, რომ საქართველო ემხრობა ახლო აღმოსავლეთში მშვიდობის დამყარების აუცილებლობის იდეას.
შეხვედრებზე ასევე აღინიშნა, რომ არსებული გეოპოლიტიკური რეალობის გათვალისწინებით, რეგიონულმა თანამშრომლობამ კიდევ უფრო დიდი მნიშვნელობა შეიძინა. ამ მხრივ, აზერბაიჯანი-საქართველო-თურქეთის სამმხრივი ფორმატი არის ძალიან კარგი მაგალითი იმისა, თუ როგორ შეუძლიათ ეფექტურად და წარმატებით ითანამშრომლონ ქვეყნებმა, რომლებიც ერთმანეთის სუვერენიტეტსა და ტერიტორიულ მთლიანობას პატივს სცემენ.
თანამედროვე მსოფლიოში მიმდინარე პროცესების გათვალისწინებით, ყურადღება გავამახვილეთ რეგიონული, სავაჭრო-ეკონომიკური და სატრანსპორტო-ენერგეტიკული თანამშრომლობის გაღრმავების პერსპექტივებზე. ვიმსჯელეთ, თუ რა ნაბიჯების გადადგმა შეიძლება, ორმხრივი ვაჭრობის განვითარების კუთხით, არსებული პოტენციალის კიდევ უფრო უკეთ ასათვისებლად. ჩვენთვის მნიშვნელოვანია საქართველოდან პროდუქციის ექსპორტის გაზრდის ხელშეწყობა, რათა ორივე მხარისთვის თანაბარი სარგებლის მომტანი იყოს თავისუფალი ვაჭრობის შესახებ შეთანხმება.
შეხვედრებზე ხაზგასმით აღინიშნა შუა დერეფნის კონცეფცია და მისი მნიშვნელობა ჩვენი ქვეყნებისათვის. ბაქო-თბილისი-ჯეიჰანის ნავთობსადენის, ბაქო-თბილისი-ერზრუმის გაზსადენის, ბაქო-თბილისი-ყარსის რკინიგზის, ბუნებრივი აირის სამხრეთ დერეფნის პროექტები ჩვენი ქვეყნების როლსა და ფუნქციას ახალ განზომილებას სძენს მსოფლიო გეოპოლიტიკურ არეალში.
ოფიციალური ვიზიტის ფარგლებში შეხვედრას გავმართავ თურქეთის დიდი ეროვნული მეჯლისის თავმჯდომარე ნუმან ქურთულმუშთან.”
