ღაზის სექტორში ბოლო 24 საათში ისრაელის სამხედრო ოპერაციას, სულ მცირე, 123 ადამიანი ემსხვერპლა, ამის შესახებ „როიტერი“ წერს. როგორც მედია იუწყება, 24 საათის განმავლობაში დაღუპულთა რიცხვი კვირის ყველაზე მაღალი მაჩვენებელი იყო.
ამასთან, როგორც „როიტერი“ წერს, დღეს „ჰამასმა“ ეგვიპტელ შუამავლებთან მოლაპარაკებები გამართა.
ისრაელის პრემიერ-მინისტრმა, ბენიამინ ნეთანიაჰუმ განაცხადა, რომ პალესტინელებმა უბრალოდ უნდა დატოვონ ქალაქი.
„მათ არ აიძულებენ გასვლას, მათ გასვლის უფლება მიეცემათ. ყველამ, ვინც პალესტინელებზე ღელავს და ამბობს, რომ პალესტინელების დახმარება სურს, უნდა გააღოს კარიბჭეები და შეწყვიტოს ჩვენთვის ლექციების კითხვა“, – განაცხადა ნეთანიაჰუმ.
ამასთან, 24 ქვეყნის საგარეო საქმეთა მინისტრებმა (მათ შორის დიდი ბრიტანეთის, კანადის, ავსტრალიის, საფრანგეთისა და იაპონიის) განაცხადეს, რომ მიმდინარე კვირაში ღაზაში ჰუმანიტარულმა კრიზისმა „წარმოუდგენელ დონეს“ მიაღწია და ისრაელს ჰუმანიტარული დახმარების დაშვებისკენ მოუწოდეს.
„ჰამასის“ მიერ მართული ჯანდაცვის სამინისტროს ინფორმაციით, 2023 წლის 7 ოქტომბრის შემდეგ ღაზაში 61 000-ზე მეტი პალესტინელი დაიღუპა.