რუსეთი, როგორც ჩანს, ემზადება ბირთვული ქობინით აღჭურვილი ფრთოსანი რაკეტის გამოსაცდელად. ინფორმაციას ამის შესახებ სააგენტო Reuters-ი წყაროებზე დაყრდნობით ავრცელებს.
კალიფორნიაში დაფუძნებული მიდლბერის საერთაშორისო კვლევების ინსტიტუტის თანამშრომელმა, ჯეფრი ლუისმა და ვირჯინიაში მდებარე CNA-ს კვლევისა და ანალიზის ორგანიზაციის წარმომადგენელმა, დეკერ ეველეტმა თავიანთი დასკვნები ცალ-ცალკე გააკეთეს. მათ ამისათვის სატელიტური ფირმა Planet Labs-ის მიერ ბოლო კვირების განმავლობაში, სამშაბათის ჩათვლით, გადაღებული სურათები შეისწავლეს.
ისინი შეთანხმდნენ, რომ ფოტოებზე ჩანს ფართომასშტაბური აქტივობა პანკოვოს საცდელ მოედანზე, რომელიც ბარენცის ზღვის არქიპელაგზე, ახალ მიწაზე მდებარეობს.
მათ შორის აღინიშნება პერსონალისა და აღჭურვილობის ზრდა, ასევე გემებისა და თვითმფრინავების არსებობა.
„ჩვენ ვხედავთ ყველა აქტივობას საცდელ მოედანზე, რაც მოიცავს როგორც ოპერაციების მხარდასაჭერად შემოტანილ უზარმაზარ მარაგებს, ასევე მოძრაობას იმ ადგილას, საიდანაც რაკეტას უშვებენ“, – განაცხადა ლუისმა.
უსაფრთხოების სფეროში წყარომ, რომელმაც ვინაობის გამჟღავნება არ ისურვა, დაადასტურა, რომ რუსეთი „ბურევესტნიკის“ გამოცდისთვის ემზადება.
ლუისის თქმით, გამოცდა შესაძლოა ამ კვირაში მოხდეს.