აშშ-ის ხაზინის დეპარტამენტმა დროებით გააუქმა სანქციები, რათა რუსეთს მიეცეს შესაძლებლობა, აშშ-ში ფული დახარჯოს ვლადიმირ პუტინისა და დონალდ ტრამპის სამიტის მხარდასაჭერად, რომელიც 15 აგვისტოს გაიმართება. ინფორმაციას ამის შესახებ ამერიკული მედია ავრცელებს.
ლიცენზია, რომლის მოქმედების ვადა 20 აგვისტოს, სამიტის დასრულებიდან ხუთ დღეში იწურება, რუსეთის მთავრობას უფლებას აძლევს, დახარჯოს ფული, ხოლო ამერიკულ კომპანიებსა და სხვა სუბიექტებს – მიიღონ გადახდები, რომლებიც სამიტთან არის დაკავშირებული და სხვა შემთხვევაში აშშ-ის მიერ დაწესებული სანქციებით აიკრძალებოდა.
ლიცენზია ნებას რთავს ისეთ გადახდებს, რომლებიც „როგორც წესი, თანმდევი და აუცილებელია ამერიკის შეერთებული შტატების მთავრობასა და რუსეთის ფედერაციის მთავრობას შორის ალასკის შტატში შეხვედრებში მონაწილეობისთვის ან მათი მხარდაჭერისთვის“.
ხაზინის დეპარტამენტის განცხადებაში არ არის მითითებული, კონკრეტულად რა ოპერაციების ნებართვა გაიცემა.