აშშ-ის პრეზიდენტმა დონალდ ტრამპმა ალასკაზე გამგზავრების დროს ჟურნალისტებს განუცხადა, რომ უკრაინის უსაფრთხოებას ევროპის ქვეყნები უზრუნველყოფენ, და არა ნატო.
„შესაძლოა, ევროპის და სხვა ქვეყნებთან ერთად, მაგრამ არა ნატოს ფორმატში, რადგან იცით, რომ არსებობს რაღაცები, რაც არ მოხდება“, – თქვა ტრამპმა კითხვის საპასუხოდ, თუ რა გარანტიებს მისცემს ვაშინგტონი კიევს.
ცნობისთვის, დღეს ტრამპი ალასკაზე რუსეთს პრეზიდენტს ვლადიმერ პუტინს შეხვდება. რუსული დელეგაცია პუტინის გარდა უკვე ალასკის ქალაქ ანკორიჯშია. რუსული დელეგაციის შემადგენლობაში შედიან: საგარეო საქმეთა მინისტრი სერგეი ლავროვი, თავდაცვის მინისტრი ანდრეი ბელოუსოვი, ფინანსთა მინისტრი ანტონ სილუანოვი, პუტინის თანაშემწე საგარეო ურთიერთობათა საკითხებში იური უშაკოვი და პუტინის სპეცწარმომადგენელი საინვესტიციო-ეკონომიკურ საკითხებში კირილ დმიტრიევი.
რაც შეეხება ამერიკულ მხარეს, ტრამპის გარდა მოლაპარაკებებში მონაწილეობას მიიღებენ: აშშ-ის სახელმწიფო მდივანი მარკო რუბიო, ხაზინის მდივანი სკოტ ბესენტი, ტრამპის სპეცწარმოამდგენელი სტივ უიტკოფი, დაზვერვის ცენტრალური სამმართველოს დირექტორი ჯონ რეტკლიფი და ვაჭრობის მდივანი ჰოვარდ ლუტნიკი.