რუსეთი მხარს უჭერს, რომ უკრაინის უსაფრთხოების გარანტიები იყოს ნამდვილად საიმედო, – ამის შესახებ რუსეთის საგარეო საქმეთა მინისტრმა, სერგეი ლავროვმა იორდანიის პრემიერ-მინისტრთან გამართულ ერთობლივ პრესკონფერენციაზე განაცხადა.
მისი თქმით, 2022 წლის აპრილში, სტამბოლში მოლაპარაკებების დროს უკრაინამ წარადგინა ინიციატივა, რომ შემუშავებულიყო უსაფრთხოების გარანტიები გაერო-ს უშიშროების საბჭოს მუდმივი წევრების, მათ შორის რუსეთის მონაწილეობით, რასაც რუსული მხარე დაეთანხმა.
„რაც შეეხება იმ ცნობებს, რომ დიდ ბრიტანეთს, გერმანიას და საფრანგეთს სურთ უსაფრთხოების კოლექტიური გარანტიების შემუშავება, ჩვენ მხარს ვუჭერთ, რომ ეს გარანტიები იყოს ნამდვილად საიმედო. აქ ჩვენ გვაქვს ძალიან კარგი მაგალითი, რომელიც, სხვათა შორის, ეხება თავად უკრაინული მხარის ინიციატივას, როგორც ეს იყო სტამბოლში 2022 წელს, როდესაც უკრაინულმა დელეგაციამ წარადგინა საბრძოლო მოქმედებების დასრულების და მდგრადი დარეგულირების უზრუნველყოფის ძირითადი პრინციპები. ამ პრინციპებს შორის იყო უკრაინის უარი ნატო-ში და სხვა სამხედრო ბლოკებში გაწევრიანებაზე, უკრაინის არაბირთვული სტატუსის დადასტურება. ამ კონტექსტში უკრაინულმა მხარემ შემოგვთავაზა – და ჩვენი დელეგაცია მაშინ ამას დაეთანხმა – შემუშავებულიყო უსაფრთხოების გარანტიები, რომლის მონაწილეები იქნებოდნენ გაერო-ს უშიშროების საბჭოს ყველა წევრი, ანუ რუსეთიც, ჩინეთი, აშშ, საფრანგეთი, ბრიტანეთი, ასევე ცალკეული ქვეყნები – ნახსენები იყო გერმანია, თურქეთი და სხვა სახელმწიფოები, რომლებიც შესაძლოა, დაინტერესებული იყვნენ, რომ შეუერთდნენ უსაფრთხოების გარანტორ ქვეყნებს. იმ კონტექსტში უკრაინული წინადადება ცალსახად ნიშნავდა, რომ ეს გარანტიები იქნებოდა თანასწორი. ყველა დაინტერესებული მხარის, მათ შორის, უკრაინის მეზობლების უსაფრთხოება იქნება უზრუნველყოფილი თანაბარ საფუძველზე. როგორც აღვნიშნე, ამ მიდგომას 2022 წლის აპრილში რუსულმა მხარემ მხარი დაუჭირა, ეს დოკუმენტი პარაფირებული იყო და ჩვენ მზად ვიყავით, ხელი მოგვეწერა ოფიციალური ხელშეკრულებისთვის. თუმცა, როგორც ცნობილია, ამაზე პრეზიდენტმა არაერთხელ ისაუბრა, ჩავიდა ბრიტანეთის მაშინდელი პრემიერი ბორის ჯონსონი და კიევში თავის ხელქვეითებს აუკრძალა რამის ხელმოწერა და მოსთხოვა საბრძოლო მოქმედებების გაგრძელება“, – თქვა ლავროვმა.
ამასთან, როგორც სერგეი ლავროვმა განაცხადა, დასავლეთში ესმით, რომ რუსეთის მონაწილეობის გარეშე მსოფლიოში კოლექტიური უსაფრთხოების საკითხების გადაწყვეტა შეუძლებელია.
„ეს არ გამოვა. ჩვენ უკვე არაერთხელ განვმარტეთ, რომ რუსეთი არ აჭარბებს თავის ინტერესებს, მაგრამ ჩვენ მტკიცედ და მკაცრად დავიცავთ ჩვენს ლეგიტიმურ ინტერესებს. დარწმუნებული ვარ, დასავლეთში, პირველ რიგში, შეერთებულ შტატებში, კარგად ესმით, რომ უსაფრთხოების საკითხების სერიოზულად განხილვა რუსეთის ფედერაციის გარეშე უტოპიაა, ეს არსაითკენ მიმავალი გზაა“, – განაცხადა რუსეთის საგარეო საქმეთა სამინისტროს ხელმძღვანელმა.
ამასთან, ლავროვმა თქვა, რომ ვაშინგტონში გამართულ მოლაპარაკებებზე რუსულ მხარეს არ მოუსმენია ევროპელი ლიდერებისგან კონსტრუქციული წინადადებები, აშშ-ის ადმინისტრაციისგან განსხვავებით.
„მაგალითად, კაია კალასმა უკვე ვაშინგტონის შეხვედრის შემდეგ განაცახადა, რომ ევროკავშირი არ ენდობა რუსეთთან არანაირ შეთანხმებას, ამიტომ ევროკავშირი გააგრძელებს უკრაინის შეიარაღებული ძალების მხარდაჭერას, რუსეთის მიმართ ახალი სანქციების წინ წაწევას, შეთანხმებების მიუხედავად, რომლებისაც მას არ სჯერა. ეს უკვე დიპლომატია არ არის, ეს არის საგარეოპოლიტიკური მეთოდების დეგრადაცია, რომელიც ევროკავშირს დაყვანილი აქვს სანქციებამდე“, – თქვა ლავროვმა.
რაც შეეხება უკრაინას, აშშ-სა და რუსეთს შორის სამმხრივი შეხვედრის შესაძლებლობასთან დასმულ შეკითხვას, ლავროვმა განაცხადა, რომ პუტინმა ტრამპთან სატელეფონო საუბრის დროს წარადგინა წინადადება უკრაინასა და რუსეთს შორის მოლაპარაკებებზე დელეგაციების დონის გაზრდასთან დაკავშირებით.
„პრეზიდენტმა არაერთხელ თქვა, რომ ჩვენ მზად ვართ ნებისმიერ ფორმატში მუშაობისთვის იმის გაცნობიერებით, რომ მუშაობა იქნება სამართლიანი და არ იქნება დაყვანილი იმ მცდელობებამდე, როგორც ამას, უპირველესად, წამყვანი ევროპული ქვეყნების ხელმძღვანელები აკეთებენ, რათა შეიქმნან პირობები, რომ აშშ კვლავ ჩაითრიონ თავიანთ აგრესიულ, საომარ კამპანიაში, უკრაინა შეინარჩუნონ, როგორც რუსეთის შეკავების და ჩვენი ქვეყნის წინააღმდეგ ომის წარმოების ინსტრუმენტი“, – თქვა რუსეთის საგარეო საქმეთა მინისტრმა.