თურქეთის პირველმა ლედიმ, ემინე ერდოღანმა აშშ-ის პრეზიდენტის დონალდ ტრამპის მეუღლეს, მელანია ტრამპს წერილი მისწერა და მას ისრაელის პრემიერ-მინისტრთან დაკავშირება და ღაზაში ბავშვების მძიმე მდგომარეობის საკითხის წამოჭრა სთხოვა. ინფორმაციას ამის შესახებ სააგენტო „როიტერი“ თურქეთის ხელისუფლებაზე დაყრდნობით ავრცელებს.
წერილში ემინე ერდოღანი აღნიშნავს, რომ ის შთააგონა აშშ-ის პირველი ლედის წერილმა, რომელიც მან რუსეთის პრეზიდენტს, ვლადიმერ პუტინს გაუგზავნა და რომელიც ბავშვების მდგომარეობას ეხებოდა.
„მე მაქვს რწენა, რომ ის მნიშვნელოვანი თანაგრძნობა, რომელიც თქვენ 648 უკრაინელი ბავშვის მიმართ გამოიჩინეთ, გავრცელდება ღაზაზეც“, – ნათქვამია წერილში, რომელსაც თურქეთის პრეზიდენტის ადმინისტრაცია აქვეყნებს.
წერილში ემინე ერდოღანი აღნიშნავს: „ამ დღეებში, როდესაც მსოფლიო კოლექტიურ გამოფხიზლებას განიცდის და პალესტინის აღიარება გახდა გლობალური ნება, მჯერა, რომ თქვენი მოწოდება ღაზასთან დაკავშირებით აღასრულებს ისტორიულ პასუხისმგებლობას პალესტინელი ხალხის მიმართ“.
პარასკევს სასურსათო უსაფრთხოების საკითხზე მომუშავე გაერო-სთან დაკავშირებულმა ჯგუფმა IPC-მა ოფიციალურად გამოაცხადა, რომ ქალაქ ღაზისა და მისი მიმდებარე რაიონების მოსახლეობა შიმშილის პირობებში იმყოფება. ანგარიშში ნათქვამია, რომ ღაზის სექტორში 500 000-ზე მეტი ადამიანი „შიმშილის, სიდუხჭირისა და სიკვდილის“ წინაშე დგას. მოხსნების თანახმად, შიმშილი ხუთ წლამდე ასაკის 132 ათასი ბავშვის სიცოცხლეს ემუქრება. გაერო-სთან დაკავშირებული ორგანოს შეფასებით, ანკლავში შიმშილი მთლიანად ადამიანის მოქმედების შედეგია. ისრაელის ხელისუფლებაში IPC-ს ანგარიშს მიკერძოებული და ყალბი უწოდეს.