მსოფლიოს უხუცესი ადამიანი, ბრიტანელი ეთილ კატერჰემი, ხუთშაბათს 116 წლის გახდა. მსოფლიოს უხუცესი ადამიანის ტიტული მან ბრაზილიელი მონაზონის, ინა კანაბარო ლუკასის გარდაცვალების შემდეგ მიიღო. ინფორმაციას cbsnews-ი ავრცელებს.
პლანეტის უხუცესი ადამიანი ლონდონის სამხრეთით, სურეიში, მოხუცთა თავშესაფარში ცხოვრობს. როგორც თავშესაფრის განცხადებაშია აღნიშნული, კატერჰემმა დაბადების დღე მშვიდად აღნიშნა და დღე “საკუთარი ტემპით” გაატარა.
“ეთილი და მისი ოჯახი ძალიან მადლიერები არიან ყველა კეთილი შეტყობინებისა და ინტერესისთვის, რომელიც მის მიმართ გამოიჩინეს 116 წლის იუბილეს აღსანიშნავად”, – ნათქვამია Hallmark Care Homes-ის განცხადებაში.
მედიის ინფორმაციით, ქალი ასაკთან დაკავშირებით ინტერვიუს მიცემას არ აპირებს, თუმცა მეფე ჩარლზ მესამესთან საუბარს არ გამორიცხავს.
ცნობისთვის, ბრიტანეთის მონარქი ხშირად პირად მილოცვებს უგზავნის ბრიტანელებს, რომლებიც 100 წლის იუბილეს აღნიშნავენ, როგორც წესი, წერილის სახით. ბუკინგემის სასახლეს ჯერ არ დაუდასტურებია, გეგმავს თუ არა ჩარლზი კატერჰემთან საუბარს.