რუსეთის საგარეო საქმეთა მინისტრმა სერგეი ლავროვმა თქვა, რომ უკრაინას არსებობის უფლება მხოლოდ იმ შემთხვევაში ექნება, თუ რუსეთის მიერ დაკავებულ ტერიტორიებს დათმობს. NBC News-თან ინტერვიუში ლავროვმა უკრაინის ხელისუფლება რუსულენოვანი მოსახლეობის დევნასა და რუსული კულტურის განადგურების მცდელობაში კიდევ ერთხელ დაადანაშაულა, უკრაინის პრეზიდენტს კი დე ფაქტო ლიდერი უწოდა, რომლის ლეგიტიმურობასაც მოსკოვი არ აღიარებს.
მისივე თქმით, უკრაინისთვის ომის შემდგომი უსაფრთხოების გარანტიების უზრუნველყოფა, რუსეთის ინტერესების გათვალისწინებით უნდა მოხდეს.
„უკრაინას არსებობის უფლება მხოლოდ იმ შემთხვევაში აქვს, თუ გაუშვებს ადამიანებს, რომლებსაც ტერორისტებს უწოდებს და რომლებმაც ნოვოროსიაში, დონბასსა და ყირიმში რამდენიმე რეფერენდუმზე ხმის მიცემით გადაწყვიტეს, რომ რუსულ კულტურას მიეკუთვნებიან – კულტურას, რომლის განადგურებასაც უკრაინა ცდილობს.
ზელენსკი რეჟიმის დე ფაქტო მეთაურია. პრეზიდენტი პუტინი მზადაა შეხვდეს მას, მაგრამ არა იმისთვის, რომ ფოტოები გადაიღონ და შემდეგ ზელენსკის იმის თქმის უფლება მიეცეს, რომ ლეგიტიმურია. ლეგიტიმურობა ცალკე თემაა. იმის მიუხედავად თუ როდის გაიმართება შეხვედრა, ვინ მოაწერს ხელს დოკუმენტს უკრაინის მხრიდან, ძალიან მნიშვნელოვანია.
რაც შეეხება უკრაინისთვის უსაფრთხოების გარანტიების მიცემას, აქ რუსეთის საბაზისო ინტერესებით უნდა იყოს გათვალისწინებული. შეგახსენებთ, რომ 2022 წლის აპრილში უკრაინა თანახმა იყო ფორმულირებაზე, რომ ყოფილიყო ნეიტრალური, არ ყოფილიყო არცერთ სამხედრო ბლოკში და არ ყოფილიყო ბირთვული სახელმწიფო“, – განაცხადა ლავროვმა